वीरेन्द्रनगर — गाउँपालिकाको केन्द्र विवादले सुर्खेतको चिङ्गाड गाउँपालिकाका कर्मचारी कामकाज र हाजिरीका लागि ६ किलोमिटर हिँडेर फरक–फरक कार्यालय धाउनु परेको छ। पालिकाले वडा ५ को अवलचिङबाट सेवा प्रवाह गर्दै आएको छ । कर्मचारीहरु हाजिरीका लागि भने वडा २ को राजीकुना जानुपरेको छ ।

यी दुबै कार्यालयको दुरी ६ किलोमिटर छ । कर्मचारीहरु हरेक दिन हाजिरीका लागि राजीकुना र काम गर्न अवलचिङ धाउने गरेका छन् ।  

पालिकाको केन्द्रमा पुग्नभन्दा पहिले सबै कर्मचारी राजीकुनास्थित पालिकाको सभा हल पुगेर हाजिर गर्नु पर्छ । पालिकामा कार्यरत करिब ४५ जना कर्मचारीको दैनिकी यसरी नै बित्ने गरेको छ । हाजिर एकातिर र काम अर्कोतिर गर्न जाँदा असहज र नियमित काममा असर परिरहेको कर्मचारीहरु बताउँछन् । 

पालिका केन्द्रको विवादले गर्दा यो समस्या भएको हो ।२०७४ मा स्थानीय तह निर्वाचनको केही महिनापछि कार्यपालिका बैठकले वडा २ को पुङ्खेतलाई केन्द्र तोक्ने निर्णय गरेको थियो । बहुमतको निर्णयविरूद्व गाउँपालिकाकी तत्कालीन उपाध्यक्ष मनमाया आचार्यलगायका १० जना स्थानीय मिलेर सर्वोच्च अदालतमा मुद्दा हालेका थिए । उनीहरूको मुद्दामा अन्तरिम आदेश दिँदै सर्वोच्चले तत्कालका लागि यो निर्णय कार्यान्वयन नगर्न र साविककै स्थानबाट काम गर्नको लागि अन्तरिम आदेश दियो । मुद्दा संवैधानिक इजलासमा विचाराधीन छ। यहीँ वर्ष फेरि हिउँदे गाउँसभाले वडा २ नम्बरको राजीकुनाबाट कामकाज गर्ने निर्णय गर्‌यो । यहाँ सामुदायिक भवन छ । फेरि पहिलेकै समूहले सर्वोच्चमा अवहेलनाको मुद्दा दिएपछि सर्वोच्चले साविककै स्थानबाट चलाउन 'स्टे अर्डर' गरेको छ ।

गाउँपालिका अध्यक्ष बोधविक्रम जिसी वडा २ को राजीकुनाबाटै काम गर्छन् । अध्यक्ष जिसीले ६ वडामध्ये ५ वटाले राजीकुनामै सहमति भएको र केन्द्र सार्ने तयारी गरिरहँदा गत महिना वडा ५ का बासिन्दाले अवरोध पुर्‍याएको बताए ।