सुर्खेत — कर्णाली प्रदेशका मुख्यमन्त्री यामलाल कँडेलले मध्यपूर्वमा बढ्दो तनावका कारण इन्धन तथा निर्माण सामग्रीमा भएको मूल्यवृद्धिले विकास निर्माणमा असर पारेको भन्दै त्यसको प्रभाव कम गर्न संघीय सरकारसँग तत्काल कदम चाल्न माग गरेका छन् । 

शुक्रबार कर्णाली प्रदेश निर्माण व्यवसायी महासंघले बुझाएको ध्यानाकर्षण पत्र ग्रहण गर्दै मुख्यमन्त्री कँडेलले मूल्यवृद्धिको असर कर्णालीसहित देशभरका विकास आयोजनामा परेको बताए । उनले यो समस्या प्रदेश सरकारको मात्र नभई राष्ट्रिय तथा अन्तर्राष्ट्रिय परिस्थितिसँग जोडिएको विषय भएकाले संघीय सरकारले गम्भीरतापूर्वक लिनुपर्ने बताए । 

‘यो अन्तर्राष्ट्रिय कारणले सिर्जना भएको राष्ट्रिय समस्या हो,’ उनले भने, ‘यदि संघीय सरकारले समयमै उपयुक्त निर्णय नगर्ने हो भने विकास निर्माणका धेरै काम प्रभावित हुन्छन् ।’ मुख्यमन्त्री कँडेलले हालै प्रधानमन्त्रीसँग सातै प्रदेशका मुख्यमन्त्रीहरूको भेटका क्रममा पनि आफूहरूले यही विषय उठाएको जानकारी दिए । 

इन्धन र निर्माण सामग्रीको मूल्यवृद्धिका कारण निर्माण व्यवसायी मात्र नभई प्रदेश सरकारका विकास आयोजना पनि प्रभावित भएको उनको भनाइ थियो । प्रदेश सरकारले आफ्नै तहबाट निर्णय गर्न खोज्दा पनि संघीय कानुनका कारण सीमित हुनुपरेको उनले बताए । ‘हामीलाई निर्देशित गर्ने कानुन संघीय कानुन भएकाले प्रदेश सरकारले एक्लै निर्णय गर्न अप्ठ्यारो छ,’ उनले भने, ‘कतिपय अवस्थामा प्रदेशका व्यवसायीका समस्या सुनेर निर्णय गर्न नसकिने होइन, तर कानुनी जटिलता छ ।’

 मुख्यमन्त्री कँडेलले पछिल्ला केही वर्षयता देखिएका विभिन्न घटनाले प्रदेश सरकारको खर्च र विकास निर्माणमा प्रत्यक्ष असर पारेको बताए । बाह्य कारणले सिर्जना भएका समस्यालाई बेवास्ता गर्दै प्रदेश सरकारको क्षमता र योग्यतामाथि प्रश्न उठाउने प्रयास भइरहेको उनको टिप्पणी थियो ।