जुम्ला — कनकासुन्दरी गाउँपालिकामा तत्कालीन अध्यक्ष नरबीर रावतले २०७७ मंसिरमा १५ बेडको अस्पतालका लागि भवन शिलान्यास गरे । कनकासुन्दरी-५ स्थित हाटसिंजामा निर्माणाधीन अस्पतालको भवन निर्माण अहिलेसम्म पूरा हुन सकेको छैन । शिलान्यास भएको सात वर्षसम्म पनि अस्पतालको भवन निर्माण सकिएर सेवा सुरु नहुनु दुःखद भएको स्थानीयको गुनासो छ ।  

अस्पताल भवन निर्माणको लागि २२ जना स्थानीयले ३ हजार ५ सय वर्गमिटर जग्गा निशुल्क उपलब्ध गराएका थिए । तर निर्माण व्यवसायीको लापरवाहीका कारण भवन समयमै नबनेपछि स्थानीय निराश छन् । 
भवनका लागि ठेकेदार कम्पनीले १५ करोड रुपैयाँमा सम्झौता गरेको छ । सम्झौतामा तीन वर्षभित्र भवन निर्माण गर्ने उल्लेख छ । तर टिडीआर लक्ष्मी मजदुर निर्माण सेवाले पेस्की लिएर पनि कामले गति लिन सकिरहेको छैन । 

अस्पताल भवन निर्माणको लागि प्राविधिक सहयोग सघन सहरी विकास तथा भवन निर्माण आयोजनाले गरेको थियो । एकातिर ठेकेदारको चरम लापरवाही र अर्कोतिर गाउँपालिकाको निरन्तर ताकेता नहुँदा अस्पताल निर्माण अलपत्र गरेको स्थानीयको गुनासो छ । 

कनकासुन्दरी गाउँपालिका प्रमुख प्रशासकीय अधिकृत दीपेन्द्र भण्डारीले अहिले अस्पताल भवनको निर्माण कार्यले गति लिएको बताए । भवन निर्माणको काम अलपत्र थियो । ठेकेदार कम्पनी नै सम्पर्कमा थिएन ।
अहिले जुम्लाका अर्जुनसिंह कठायतले कामको जिम्मा लिएपछि निर्माणको काम अघि बढेको छ । सुरुमा ठेकेदारले १ करोड २८ लाख रुपैयाँ पेस्की लिएर काम अलपत्र छाडेका थिए । पहिलो रनिङ बिल १ करोड ४ लाख रुपैयाँ पनि भुक्तानी भइसकेको छ । दोस्रो रनिङ बिल ५५ लाख रुपैयाँको भुक्तानी प्रक्रियामा छ । पहिले ठेकेदारको बदमासीले भवन समयमै बन्न नसकेको र अहिले म्याद थपेर तीब्र गतिमा काम भइरहेको गाउँपालिकाले जनाएको छ ।