सल्यान — दैनिकजसो वनमा लाग्ने डढेलोका कारण निस्केको धूवाँले सल्यानमा वायु प्रदूषण बढ्दै गएको छ । सुरक्षाकर्मी, सम्बन्धित निकाय र सामुदायिक वनका उपभोक्ता मिलेर एक ठाउँमा लागेको डढेलो नियन्त्रण गर्न नपाउँदै स्थानीयको लापरबाहीका कारण अर्को स्थानमा डढेला सल्किँदा वायु प्रदूषण बढ्दै गएको हो । 

वायु प्रदूषणका कारण मानव स्वास्थ्यमा विभिन्न किसिमको असर पर्न थालेको छ । प्रदूषणका कारण जिल्लावासीमा श्वासप्रश्वास, आँखा पोल्ने, पाक्ने, पिरो हुने, टाउको दुख्ने घाँटी खसखस गर्ने, नाक बन्द हुने, छालामा एलर्जी हुने समस्या देखिन थालेको छ । डढेलोका कारण धूवाँ फैलिँदा दमको रोग भएका वृद्धवृद्धा सबैभन्दा बढी प्रभावित भएका छन् । 

प्रदूषणका कारण अस्पताल तथा स्वास्थ्यसंस्थामा बिरामी बढ्न थालेका छन् । वायु प्रदूषणले जिल्ला अस्पताल सल्यानमा श्वासप्रश्वासमा समस्या भएका बिरामी उपचार गर्न आइरहेको स्वास्थ्य सेवा कार्यालय सल्यानका प्रमुख डा. अर्जुन बुढामगरले बताए । श्वासप्रश्वास तथा दम रोगसम्बन्धी दैनिक १०/१२ जना बिरामी अस्पतालमा आइरहेका तर भर्ना गर्नुपर्ने अवस्था नरहेको उनले जानकारी गराए । वायु प्रदूषणले सबैभन्दा बढी दम र आँखाका रोगीलाई असर गर्ने भएकाले घरदेखि बाहिर निस्किँदा मास्क तथा चस्मा लगाउन डा. बुढा मगरले जिल्लावासीलाई आग्रह गरेका छन् ।