सल्यान — जिल्ला अस्पताल सल्यानमा एक सातादेखि शल्यक्रिया सेवा बन्द भएको छ । चिकित्सकको अभावमा गत चैक्र २८ गतेदेखि शल्यत्रिया सेवा बन्द भएको हो । 

शल्यक्रिया सेवा बन्द भएपछि नजिकै न्यून शुल्कमा सुविधा पाएका बिरामी अहिले धेरै रकम खर्चेर दाङ, नेपालगन्ज, सुर्खेत धाउन बाध्य भएका छन् । दुई/तीन घन्टा गाडी तथा एम्बुलेन्समा सवार गरेर बाहिर जानुपर्दा जटिल समस्या भएका गर्भवतीलाई बढी समस्या हुने गरेको छ ।  

जटिल समस्या भएका गर्भवतीलाई लक्षित गरी जिल्ला अस्फताल सल्यानमा डेढ दशकअघि शल्यक्रिया सेवा सुरु गरिएको थियो । शल्यत्रिया सेवा ठप्प भएपछि विभिन्न पालिकामा रहेका आधारभूत अस्पताल, प्राथमिक स्वास्थ्य केन्द्र तथा स्वास्थ्य चौकीबाट रिफर भएर आएका महिला बढी प्रभावित भएका छन् । जिल्लाका विभिन्न ग्रामिण क्षेत्रबाट गाडी रिजर्भ गरी जिल्ला अस्पताल आउने र त्यहाँबाट बाहिर जानु पर्दा जिलाबासीलाई सास्ती भएको छ । 

जिल्ला अस्पताल सल्यानमा कार्यरत एमडिजिपी डा. बुद्धिनाथ शाह विरामी भएर उपचारमा रहेको र अर्का डा. अशिम अधिकारी एमडी पढ्न गएपछि अस्पतालमा शल्यक्रिया सेवा रोकिएको जिल्ला स्वास्थ्य सेवा कार्यालय सल्यानका प्रमुख डा. अर्जुन बुढामगरले बताए । 

सेवा प्रभावित भएपछि संघ र प्रदेश सरकारलाई जानकारी गराएर चिकित्सको माग गरेको उनले बताए । ‘जिल्ला अस्पताल सल्यानमा महिनामा एक सय भन्दा बढी सुत्केरी हुने गर्छन्, त्यसमध्ये जटिल समस्या भएका १०/१२ जनाको शल्यक्रिया गुर्नपर्छ । जिल्ला अस्पताल आएका विरामीलाई बाहिर पठाउन नपरोस् भन्ने चाहन्छौं । चिकित्सक नभएपछि बाध्य भएर अहिले बाहिर पठाउनु परेको छ,’ उनले भने । दक्ष जनशक्तिको अभावमा बेलाबेला जिल्ला अस्पतालमा समस्या देखिरहने उनले बताए ।  

जिल्ला अस्पताल सल्यानमा चिकित्सक नभएर शल्यक्रिया सेवा बन्द रहेको खबर पाएपछि २३ वर्षकी एक गर्भवतीलाई बिहीबार सुर्खेत लगेको छिमेकी बन्गाड कुपिण्डे नगरपालिका–१२ निगालचुलाका दिपक रानाले बताए । कालिमाटी हुँदै सुर्खेत जानु पर्दा धेरै समय लागेको र गाडी भाडा मात्रै १० हजार लागेको उनले बताए ।