वीरेन्द्रनगर — सोमबार दिउँसो जिल्ला ट्राफिक प्रहरी कार्यालय सुर्खेतमा ३० जनाभन्दा बढी महिला अटोचालक जम्मा भए । कहिलेकाहीँ काम पर्दा मात्र ट्राफिक कार्यालय पुग्ने गरेका उनीहरूलाई आज भने ट्राफिक प्रहरीले नै यहाँ बोलाएको थियो ।

पहिलोपटक जिल्लाभरका महिला अटोचालकलाई प्रहरीले कार्यालयमा बोलाउँदा उनीहरूले अचम्म माने । के गर्ने ? कस्तो गर्ने मेसो नपाएका बेला जिल्ला ट्राफिक प्रहरी कार्यालय सुर्खेतका प्रमुख प्रहरी निरीक्षक रोहित शाहीले उनीहरूका समस्या बुझ्न र समाधानका लागि पहल गर्न कार्यक्रम आयोजना गरिएको जानकारी गराउँदा उनीहरू उत्साही देखिए ।

परिचयात्मक कार्यक्रमबाट सुरु भएको कार्यक्रममा नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय सुर्खेतका प्रमुख मुकुन्दप्रसाद रिजालले उनीहरूका गुनासा सुन्नका लागि कार्यक्रम आयोजना गरिएको  बताए । त्यसपछि खुल्दै गएका उनीहरूले आफ्ना धेरै समस्या निर्धक्कसँग पोखे । 

वीरेन्द्रनगर नगरपालिका–३ की शान्ति बुढाले महिला अटोचालकलाई हेर्ने दृष्टिकोण गलत भएको गुनासो गरिन् । ‘बाटोमा अटो गुडाउँदा कस्ता महिलाले अटो चलाउँछन् भन्ने कुरा आफूहरूलाई थाहा भएको’ जस्ता अभिव्यक्ति सुन्नु परेको उनले बताइन् । ‘यात्रुसँगै अन्य नागरिकले पनि हामीलाई नराम्रो नजरले हेर्छन्,’ उनले भनिन्, ‘हामीले प्रहरीबाटै पनि भनेजस्तो सहयोग पाएका छैनौं ।’

आफूहरूलाई हेर्ने नजरै फरक भएको सुनाइन् वीरेन्द्रनगर नगरपालिका– ५ की सुस्मिता विकले पनि । ‘नम्बर माग्नेदेखि सँगै खाजा खाऊँ’ भन्नेसम्मका कुरा आफूले भोग्दै आएको उनको भनाइ थियो । यात्रुले नम्बर लिएर हैरानी दिने गरेको गुनासो पनि उनले सुनाइन् । गलत व्यवहार गर्ने दुई जनालाई प्रहरी कार्यालयमै ल्याएर थुनाएको पनि उनले जानकारी दिइन् । 

‘विभिन्न चुनौती छिचोल्दै पाँच वर्षदेखि अटो चलाउँदै आएकी छु,’ उनले भनिन्, ‘टाढै देख्दा डर लाग्ने ट्राफिक प्रहरीको आजको कार्यक्रमले नयाँ ऊर्जा दिएको छ ।’ ट्राफिकको कार्यक्रममा आएपछि पहिलोपटक आफूले सम्मानित पेसा गरेको महसुस भएको पनि उनले सुनाइन् । कार्यक्रममा सहभागी धेरैले आफूहरूले यात्रु र प्रहरीबाट सहयोग नपाएको बताएका थिए ।

खुलेर आफ्ना समस्या राखेका उनीहरूलाई प्रदेश ट्राफिक प्रहरी प्रमुख रिजालले नारी र पुरुषलाई समाजमा हेर्ने दृष्टिकोणलाई चिर्दै जोखिमपूर्ण व्यवसाय गर्ने महिलालाई प्रोत्साहन गर्नका लागि गुनासो सुन्ने हेतुले नै यो कार्यक्रमको आयोजना गरिएको बताए । घरको जिम्मेवारी सम्हालेर पनि व्यवसाय गर्दै आत्मनिर्भर बनेका महिलाको गुनासो सुनेपछि समाधानका लागि पहल गर्ने प्रतिबद्धता उनले व्यक्त गरे । फिल्डमा खटिने प्रहरीले महिला अटो चालकलाई गर्ने व्यवहार परिवर्तन गर्नका लागि उनले निर्देशन पनि दिए । ‘प्रहरी कर्मचारी वा अरु कसैले तपाईंहरूलाई नराम्रो व्यवहार गरेमा खबर गर्नुहोला,’ उनले भने, ‘नजिक भएमा म आफैं फिल्डमा पुग्छु । फोन गर्नुभयो भने प्रहरी कर्मचारी वा जोसुकैलाई पनि कारबाहीको दायरामा ल्याउने छु ।’ 

ट्राफिक नियमको पालना गर्नुपर्ने बताउँदै उनले जोखिम मोलेर यात्रा नगर्नका लागि सुझाव दिए । क्षमताभन्दा बढी यात्रु नराख्नका लागि पनि उनले आग्रह गरे । ‘प्रहरीले गर्नुपर्ने समन्वय र सहकार्यका लागि हामी सधैं तयार छौं,’ उनले भने । गलत सोच भएकाहरूविरुद्ध एकजुट हुनुपर्ने बताउँदै रिजालले प्रहरी सधैं अटोचालक महिलाको साथमा रहेको पनि बताए ।

अटो चालक महिलाले वीरेन्द्रनगरमा पार्किङ र रुटपरमिटको समस्या भएको जानकारी गराएका थिए । यसका लागि नगरपालिकासँग समन्वय गर्ने प्रतिबद्धता प्रहरीले गरेको छ ।

अटो चालक शान्ता परियारलाई ट्राफिक प्रहरीसँगको समन्वय र चालकका समस्या सहजीकरणका लागि तोकिएको छ । उनले महिला अटोचालकसँग समन्वय गर्ने र उनीहरूका समस्या प्रहरीसम्म पुर्‍याउने काम गर्ने प्रहरी निरीक्षक शाहीले बताए ।