चन्दननाथ भैरवनाथ गुठी समितिका अध्यक्ष अमरबहादुर थापाले लिंगो बोक्ने दिनमा सार्वजनिक बिदा दिएर प्रदेश सरकारले यहाँको धार्मिक आस्थालाई अझै बलियो बनाएको प्रतिक्रिया दिए ।
What you should know
जुम्ला — कर्णाली प्रदेश सरकारले जुम्लास्थित कर्णालीको प्रमुख धार्मिक पर्यटकीयस्थल चन्दननाथ मन्दिरको लिंगो बोक्ने दिनमा सार्वजनिक बिदा दिने भएको छ ।
मंगलबार बसेको मन्त्रिपरिषद् बैठकले जंगलबाट लिंगो बोकेर ल्याउने दिनका रूपमा आगामी असोज २२ गतेलाई मेलाका रूपमा मनाउने निर्णय गरेको हो । यो दिनको बिदा जुम्लाका लागि मात्रै लागू हुनेछ ।
कर्णाली प्रदेशमा गरिएको यो निर्णयले धार्मिक पर्यटनलाई अझै उत्साहित बनाइरहेको जुम्लाबासीले बताएका छन् । चन्दननाथ भैरवनाथ गुठी समितिका अध्यक्ष अमरबहादुर थापाले लिंगो बोक्ने दिनमा सार्वजनिक बिदा दिएर धार्मिक आस्थालाई अझै बलियो बनाएको प्रतिक्रिया दिए । उनले भने, ‘जंगलबाट लिंगो ल्याउन सरकारी तथा गैरसरकारी निकायको सहभागितासमेत रहने गरेको छ । यो बिदाले उनीहरूलाई समेत राहत मिल्नेछ ।’ कर्णाली प्रदेश सरकारले चैत १२ गते जुम्लामा मात्र धान दिवस बनाउने गरेर सार्वजनिक बिदा दिँदै आएकामा लिंगो बोक्ने दिनमा समेत बिदा दिइएको हो ।
परम्परादेखि चन्दननाथ नगरपालिका–३ स्थित लामासिम रडिखेल्ला जंगलबाट चन्दननाथ मन्दिरको लिंगो बनाएर ल्याउने चलन छ । चन्दननाथ मन्दिरका लागि ५२ हातका दुई लिंगा र भैरवनाथका लागि ४८ हातका लिंगा हाल्ने चलन छ । ऋषि पञ्चमीका दिनमा जंगलमा लिंगा निकालेर आश्विन कृष्ण त्रयोदशीमा सदरमुकाम खलंगामा ल्याइपुर्याउनुपर्ने धार्मिक मान्यता छ । 
घटास्थापनाको दिनमा पूजापाठ गरेर चन्दननाथ भैरवनाथ मन्दिरमा लिंगा खडा गर्ने चलन रहेको गुठी समितिका अध्यक्ष अमरबहादुर थापाले जानकारी दिए । पहिलेका मानिसहरू लिंगा हातहातमा राखेर खलंगाको चन्दननाथ भैरवनाथ मन्दिरसम्म लिंगा ल्याइपुर्याउँथे । बीचमा काँधमा बोकेर ल्याउने चलन बस्यो । सदरमुकाम खलंगामा गाडी पुगेसँगै दुई–चार वर्ष त ट्याक्टरमा समेत बोकेर लिंगा ल्याउन थालियो । अहिले नेपाली सेना, नेपाल प्रहरी, सशस्त्र प्रहरी र आमनागरिकले सडकमा घिसारेर लिंगा खलंगामा पुर्याउने गरेका छन् ।
जंगलमा लिंगा बनाउन जाँदाको पहिलो दिनमा जंगलको पुजा हुन्छ । त्यहाँ बोको चढाएर मात्र रुख काट्ने चलन छ । लिंगा तान्न पूजापाठ गरेर बाजागाजासहितको टोली नै जंगल जाने गर्छ ।
पहिले लिंगा तान्न प्रयोग गर्ने लठ्ठाहरू चौरी फुर्काहरू मुगु जिल्लादेखि ल्याउने गरेका थिए । चौरी फुर्काहरू बाँध्ने डोरी हुम्लाबाट आइरहन्थ्यो । लिंगा खडा गर्न चाहिने बाबियोका डोरी कालिकोटबाट पठाइन्थ्यो । अहिले यी सबै जिल्लाबाट सबै सामान आउन छाडेका छन् । तर प्रदेश सरकारले यो दिनमा बिदा नै दिने भएपछि धार्मिक आस्था बढ्दै जाने विश्वास गरिएको छ । स्थानीय नवराज अधिकारीले भने, ‘लिंगा बोकेर ल्याउने दिनमा प्रदेश सरकारले बिदा दिँदा यो मन्दिरको अझै महत्त्व बढेको छ ।’
