कालिकोट — यहाँस्थित योगी नरहरिनाथ आधारभूत अस्पताल जिल्लाकै पहिलो पोषण उन्मुख स्वास्थ्य संस्था घोषणा गरिएको छ । हरेक बार खाना चार अवधारणालाई घरघरसम्म पुर्‍याएर कुपोषण अन्त्य गर्ने उद्देश्यले पोषण उन्मुख स्वास्थ्य संस्था घोषणा गरिएको हो ।

जिल्ला अस्पतालपछि एमबीबीएस चिकित्सक दरबन्दी भएको यो पुरानो अस्पताल हो । स्थानीय स्वास्थ्य व्यवस्थापन समिति अध्यक्ष कटकबहादुर बुढाको अध्यक्षतामा आयोजित घोषणामा गाउँपालिका उपाध्यक्ष कमलकुमार शाह, स्वास्थ्य शाखा प्रतिनिधि सिर्जना महत, महिला बालबालिका तथा ज्येष्ठ नागरिक शाखा प्रमुख सरिता विष्ट, महिला स्वास्थ्य स्वयंसेवी, आमा समूह, शिक्षक, विद्यार्थी, राजनीतिक दलका प्रतिनिधि र स्थानीयको सहभागिता थियो । 

पोषण मैत्री घोषणाका १६ मध्ये १३ सूचक पूरा गरेपछि समुदायमा सचेतना जगाउन अस्पताललाई पोषण उन्मुख घोषणा गरिएको अस्पताल प्रमुख डा. शिवनाथ यादवले बताए । १३ वटा सूचक पूरा भएकाले ९० प्रतिशत भन्दा बढी सफलता हासिल गरेको उनले बताए । एक वर्षभित्र बाँकी सूचक पनि पूरा गरेर पोषण मैत्री घोषणा गरिने उनले बताए ।