विद्यालयसम्म सडक पहुँच पुगे पनि मोटरसाइकल खरिद गर्न आर्थिक अभाव भएपछि विद्यालयको दैनिक कामकाजलाई सहज बनाउन आफूले सहयोग गरेको सांसद धनबहादुर बुढाले बताए ।
डोल्पा — यहाँबाट निर्वाचित प्रतिनिधिसभा सदस्य धनबहादुर बुढाले त्रिपुरासुन्दरी नगरपालिका–७ पहाडास्थित कस्तूरी माध्यमिक विद्यालयलाई मोटरसाइकल खरिदका लागि २ लाख रुपैयाँ सहयोग गरेका छन्।
विद्यालयसम्म सडक पहुँच पुगे पनि मोटरसाइकल खरिद गर्न आर्थिक अभाव भएपछि विद्यालयको दैनिक कामकाजलाई सहज बनाउन आफूले सहयोग गरेको सांसद बुढाले बताए । आफूले यसअघि पनि विपन्न, दुःखी पीडित तथा मन्दिर–गुम्बा निर्माण र पुनर्निर्माणमा खर्च गर्दै आएको उनले सुनाए।
यसपटक डोल्पाली जनताले चौथो पटक निर्वाचित गराएकाले आफूले पाउने सेवा–सुविधा नलिने र त्यसलाई समाजसेवामै लगाउने प्रतिबद्धता पनि उनले दोहोर्याए।
मोटरसाइकल खरिदमा आर्थिक सहयोग गरेको भन्दै विद्यालयले सांसद बुढालाई धन्यवाद ज्ञापन गरेको छ ।
