जुम्ला — प्रधानमन्त्री सुशीला कार्की कर्णालीको भ्रमणका क्रममा जुम्ला आइपुगेकी छिन् । उनी फागुन २१ मा सम्पन्न प्रतिनिधिसभा सदस्य निर्वाचनलाई सफल बनाउन फिल्डमै खटिएर भूमिका निर्वाह गर्ने कर्मचारी, सुरक्षाकर्मी तथा नागरिकप्रति धन्यवाद व्यक्त गर्न कर्णाली भ्रमणमा निस्किएकी हुन् । 

प्रधानमन्त्री कार्कीका प्रेस सल्लाहकार राम रावलले निर्वाचनपूर्वको निरीक्षण भ्रमणमा उहाँ कर्णाली पुग्न नसक्नु भएकोले निर्वाचनपछि कर्णालीमा पुगेको बताए । प्रधानमन्त्री कार्कीले मुगुमा जिल्लास्तरीय सुरक्षा प्रमुखहरुसँग अन्तरक्रिया गरिन् । 

जुम्ला पुगेर जिल्लास्तरीय सुरक्षा प्रमुखहरुसँग छलफल गरिन् । छलफलमा प्रधानमन्त्री कार्कीले सीमित स्रोत साधन र कठिन भूगोलका बाबजुद पनि प्रभावकारी समन्वय र प्रतिबद्धताका साथ निर्वाचन सम्पन्न गराएकोमा सुरक्षा निकाय र कर्मचारीहरुको प्रशंसासमेत गरिन् । 

उनले भ्रमणका क्रममा भेटिएका स्थानीय नागरिकलाई समेत निर्वाचनलाई शान्तिपूर्ण र सफल बनाउन देखाइएको एकता, सद्भाव र सहकार्यप्रति विशेष धन्यवाद व्यक्त गरिन् । 

प्रधानमन्त्री कार्कीले भनिन्, ‘देशले कठिन परिस्थितिमा पनि लोकतान्त्रिक अभ्यासलाई सफल बनाएको छ । जसको श्रेय सबै नेपाली जनतालाई जान्छ ।’ प्रधानमन्त्री कार्कीले जुम्लास्थित कर्णाली प्राविधिक शिक्षालयको अवलोकन पनि गरिन् । विसं २०३७ सालमा स्थापना भएको उक्त संस्थालाई नेपालकै पहिलो प्राविधिक शिक्षालयमध्ये एक मानिदै आएको छ । विद्यार्थी, शिक्षक तथा स्थानीय बासिन्दाहरूले प्रधानमन्त्रीलाई लालीगुराँस दिएर स्वागत गरेका थिए ।