वीरेन्द्रनगर — सुर्खेतमा खाना पकाउने ग्यास किन्नका लागि पसलहरुमा उपभोक्ताको भीड लाग्ने गरेको छ । ग्यासको स्थानीय डिलर र अन्य ग्यास पाइने पसलहरुमा शुक्रबार बिहानैबाट उपभोक्ताको भीड लागेको थियो । 

पछिल्लो समय पश्चिम एसियामा बढेको तनावले गर्दा ग्यास अभाव हुन थालेपछि स्थानीयले धमाधम ग्यास भर्न थालेका छन् । इरान र इजरायल युद्धमा धकेलिएपछि इन्धनको अभाव हुनसक्ने भन्दै सरकारले आपूर्तिलाई सहज बनाउन आधा भरिएको सिलिण्डर बिक्री गर्न सुरु गरेको थियो ।

ग्यासको अभाव हुने कुरा सुनेपछि दुईवटा खाली सिलिन्डर ग्यास शुक्रबार बिहानै भरेको वीरेन्द्रनगर नगरपालिका–७ कि स्थानीय शान्ता खड्काले बताइन् । लामो समय पर्खेर ग्यास भरेको बताउँदै उनले भनिन्,‘सामाजिक सञ्जालमा समाचारहरु देखेका थियौं । परिवारमा सल्लाह गरेर भरेका हौं । धेरे आफन्तले पनि खाली ग्यास भरेका छन् । नयाँ ग्यास पनि धेरैले किने ।’

शुक्रबार साँझ ग्यास सकिएपछि बजारभरि खोज्दा पनि नपाएको वीरेन्द्रनगर–२ का स्थानीय ईश्वर रानामगरले बताए । कोठा लिएर बस्ने साथी देवीराज कठायतका लागि बिच बजार, मंगलगढी, एरीचोक, बांगेसिमल लगायतका स्थानका ग्यास पाइने पसलमा गएको थिएँ । उनी भन्छन्,‘सबैले छैन मात्र भन्छन् । यतिछिट्टै सकिएको जस्तो लाग्दैन । लुकाएर राखेका छन् जस्तो लागेको छ ।’ ग्यास नभेटिएपछि साना बालबालिका लिएर होट जानुको विकल्प नभएको उनले बताए ।

वीरेन्द्रनगर–१५ रतु घर भई पिपीरा बस्दै आएका प्रेमबहादुर शाहीले धेरै ग्यास पसल धाउँदा पनि ग्यास नपाएको गुनासो गरे । भएको पसलमा चुलो लिएपछि मात्र बेच्ने कुरा व्यापारीबाट आएको बताए । जिल्लामा ग्यासको अभाव भएको उनी बताउँछन् ।

भेरी ग्यासको सुर्खेत विक्रेता विनोद दाहालले भने ग्याल अभाव नभएको बताए । उनका अनुसार ग्यास लिनको लागि उपभोक्ताको भीड पसलमा बिहानैबाट लागेको थियो । अनावश्यक हल्लाले गर्दा एकैदिन धेरै किन्न आएको उनी बताउँछन् । एकै जनाले दुई वा त्यो भन्दा बढी खाली सिलिन्डरहरु भर्न आएकोले भीडभाड देखिएको उनी बताउँछन् ।

जिल्ला प्रशासन कार्यालय सुर्खेतले ग्यास तथा इन्धनको कृत्रिम अभाव सिर्जना गरे कारबाही गरिने चेतावनी दिएको छ । व्यापारीहरूले यही मौकाको फाइदा उठाउन खोजेपछि प्रशासनले यस्तो चेतावनी दिएको हो ।