ठाउँठाउँमा राके जुलुस निकाल्ने, भित्ते लेखन गर्ने, उम्मेदवार र मतदातालाई धम्काउने ८ जना पक्राउ
सुर्खेत — २१ फागुनमा हुने प्रतिनिधिसभा निर्वाचन बहिष्कार र बिथोल्न खोजेको आरोपमा प्रहरीले ८ जनालाई पक्राउ गरेको छ । आफूहरूलाई निर्वाचन बहिष्कार पक्षधर बताउने ८ जना सुर्खेत, कैलाली, रुकुम र कालीकोट निवासी रहेका छन् ।
ठाउँठाउँमा राके जुलुस निकाल्ने, भित्ते लेखन गर्ने, उम्मेदवार र मतदातालाई धम्काउनेजस्ता क्रियाकलाप गरेको आरोपमा पक्राउ गरेको कर्णाली प्रदेश प्रहरी प्रमुख डीआईजी जयराज सापकोटाले बताए ।
पक्राउ पर्नेमा कालीकोटका क्रान्तिकारी कम्युनिस्ट पार्टीका जिल्ला इन्चार्ज नारायण न्यौपाने, कालीकोटका वैज्ञानिक समाजवादी कम्युनिस्ट पार्टीका जिल्ला सचिव धिर दर्जी, कर्णबहादुर बीसी रहेका छन् ।
धनगढी उपमहानगर बस्ने वैज्ञानिक समाजवादी कम्युनिस्ट पार्टीका सचिव श्याम कुँवर, नेकपा बहुमत पार्टी सुर्खेतका जिल्ला सचिव राजकुमार पौडेल, रन्त बहादुर वली, पूर्ण तिरुवा र रुकुम पश्चिमका मान बहादुर मल्ल रहेका छन् ।
