सल्यान — भारतको हिमाञ्चल प्रदेशस्थित सोलान जिल्लाको अर्कीमा पसल रहेको घरमा आगलागीका कारण ग्याँस सिलिन्डर विष्फोट हुँदा ज्यान गुमाएका सिद्धकुमाख गाउँपालिका–२ टाकुराका बासिन्दाका परिवार राहतबाट बञ्चित भएका छन् ।

एक महिनाअघि उक्त विष्फोटमा परेर दुई परिवारका ९ जनाको मृत्यु भएको थियो । मृतकका परिवारले अहिलेसम्म भारत सरकार र सम्बन्धित पालिकाबाट कुनै राहत तथा सहयोग पाएका छैनन्।

मृतकको डीएनए परीक्षणमा ढिलाई हुँदा आफन्तले राहत पाउन नसकेका हुन् । गत पुस २७ गते राति विष्फोटमा परेर जिल्लाका ३३ वर्षीय धनबहादुर विक, उनकी श्रीमती कविता, छोरी राधा, रेनुका र छोरा राजनको मृत्यु भएको थियो । त्यस्तै घटनामा ४७ वर्षीय काशीराम विक, उनकी श्रमती टीका, छोरी १२ वर्षीया अनु र ७ वर्षका छोराको मृत्यु भएको थियो । 

घरमा बसेर दुई छाक जोहो गर्न समस्या भएपछि मजदुरी गर्न टाकुराका बासिन्दा दुई वर्षअघि अर्की गएका थिए । मृतक काशीरामका भाई मोहनले भारत सरकारले डीएनए परीक्षणमा ढिलाई गरेकाले राहतको प्रक्रिया अगाडि बढ्न नसकेको बताए । सिलोन जिल्लाको अर्कीमै ठेकेदारको काम गर्दै आएका उनका अनुसार सिलोनको स्थानीय सरकारले डीएनए परीक्षणसँगै मृत्यु–जन्मदर्ता, नागरिकता लगायत कागजपत्र तयार गर्न भनेको छ । ‘यी कागजात तयार भएपछि मात्रै राहतको प्रक्रिया अगाडि बढाउँछौ भन्छ,’ उनले भने, ‘तर डीएनए रिर्पोट समयमै नआउँदा कागजपत्र तयार गराउन सकिएको छैन र घर फर्कन पनि पाएका छैनौं ।’

स्थानीय सरकारले राहत उपलब्ध गराउने भनेपछि काशीरामका छोरा सुशील र ११ अभिषेकको नाममा खाता खोलिदिएका उनले जानकारी दिए । राहतस्वरुप कति रकम उपलब्ध हुन्छन भन्ने पत्तो नभएको उनले बताए । ‘सिलोन सरकारले अहिलेसम्म किरिया खर्च वापत २५ हजार रुपैयाँ दिएको छ,’ उनले भने, ‘डीएनए रिपोर्ट नआउँदासम्म थप राहतकालागि कागजपत्र जुटाउन घर फर्किन सकेको छैन ।’