रुकुम पश्चिम — प्रतिनिधि सभाको चुनाव नजिकिँदै गर्दा बिभिन्न अन्तरबिरोधकाबीच नेपाली कांग्रेस रुकुम पश्चिमका उम्मेदवार राजु केसीले चुनाबी प्रचार सुरु गरेका छन् । 

बिहीबार र शुक्रबार जिल्ला पार्टी कार्यालयमा बसेको जिल्ला कार्यसमितीको बृहत बैठकबाट कार्यतालिका बनाएर प्रचार–प्रसारमा लागेका हुन् ।

कांग्रेस रुकुम पश्चिमका जिल्ला सभापति प्रेमप्रकाश वलीले राजु केसीलाई उम्मेदवार बनाइएकोमा सार्वजनिक असन्तुष्टि व्यक्त गरेपछि बढेको मतभेद उक्त बैठकले अन्त्य गरेको सहसचिब यज्ञ विष्टले बताए । 

‘जिल्ला कार्यसमितीको बैठकबाट यही माघ १७ देखि फागुण ८ गतेसम्म घरदैलोमै पुगेर मतदाता भेटघाट गर्ने र फागुण ९ देखि १४ गतेसम्म पालिका स्तरीय चुनावी सभा गर्ने तय भएको छ,’ उनले भने, ‘अब पार्टीभित्र कुनैपनि प्रकारको अन्तरबिरोध र मतभेद छैन । केही भएको भए पनि हामीले एकअर्कामा माझिएर चुनावी प्रचारमा होमिने सर्वसम्मत निर्णय गरेका छौँ ।’ 

उपसभापति हर्कसिंह खत्रीको संयोजकत्वमा ३ सय १ सदस्यीय निर्वाचन परिचालन समिति पनि गठन गरिएको छ।

जिल्ला सभापति प्रेमप्रकाश वलीले जिल्ला कार्यसमितीले गरेका निर्णय कार्यन्वयन गरेर जाने कुरामा आफू प्रतिवद्ध रहेको भए पनि पार्टीभित्र अन्तरविरोध र असन्तुष्टि भने कायम रहेको बताए । जिल्लाबाट आफ्नो र गोपालजीजंग शाहको नाम सिफरिस गरिएको तर केसीले टिकट पाएकोमा उनले खुलेरै असन्तोष व्यक्त गरे । 

‘म त चुनाबी प्रचारमा लाग्छु, तर अरु साथीहरुको भन्न सकिन्न,’ वलीले कान्तिपुससँग भने, ‘केही पार्टीका नेता–कार्यकर्ता त अहिलेपनी अरु पार्टीमा प्रवेश गर्ने क्रम सुरु भएको छ । यसले पनि हामीलाई घाटा नै पुर्‍याउछ । राजुजी सीमित मान्छेहरुकाबीचमा नै रमाइरहनुभएको छ । यसले उहाँ स्वयं र रुकुम पश्चिम कांग्रेसलाई घाटा नै हुन्छ ।’ 

सहसचिव बिष्ट भने अन्तरविरोध र मतभेदहरु सबैतिर हुने तर त्यसलाई हल गरेर जाने कुरामा लाग्नुपर्नेमा जोड दिन्छन्। ‘सभापतिज्यू पनि प्रचारमा लाग्नुपर्छ र लाग्नुहुन्छ,’ उनले भने, ‘कांग्रेसको जिम्मेवारीमा रहेका कोही कसैले पनि यो अवस्थामा गैरजिम्मेवार बन्न मिल्दैन । यदि पार्टी अनुशासन बाहिर गएर कसैले कुनै गतिविधि गरेमा त्यो विधानतः कारबाहीको भागिदार हुनुपर्छ ।’

पार्टी कार्यालय बाहिर उम्मेदवारको सम्पर्क कार्यालय

उम्मेदवार राजु केसीले जिल्ला कार्यालयभन्दा करिब ५ सय मिटर टाढा छुट्टै कोठा भाडामा लिएर ‘सम्पर्क कार्यालय’ खोलेका छन् । यसले पनि कांग्रेस रुकुम पश्चिमको अन्तरविरोधलाई संकेत गर्छ ।

उम्मेदवार होस वा अरु कोही पार्टीसंग जोडिएको गतिविधि कार्यालयभित्रैबाट हुनुपर्ने कुरामा जोड दिँदै सभापति वलीले सम्पर्क कार्यलय खोलिएको बिषयमा अनविज्ञता प्रकट गरे । मुसिकोट नगरपालिका–१ स्थित खलंगा बजारमै कांग्रेसको १५ कोठा र एउटा हल भएको ठूलो पार्टी कार्यालय छ । तर उम्मेदवार केसीको सम्पर्क कार्यालय कालिका मन्दिर नजिकै एउटा निजी घरमा कोठा भाडामा लिएर खोलिएको छ ।