‘जुम्लामा एमाले पहिलो पार्टी हो । तर पार्टीभित्रको प्राविधिक कमजोरी चुनाव हराउने साधन बनिरहेको छ । यस पटकको चुनावमा त्यो हुन दिन्नौं,’ जुम्लाका एमाले उम्मेदवार शान्तिलाल महतले भने, ‘यसपटक चुनाव जितेर लामो समयदेखि गुमेको साख फिर्ता ल्याउने अभियानमा छौं ।’
What you should know
जुम्ला — कर्णालीमा राम्रो पकड भए पनि नेकपा एमाले जुम्लामा २०५६ सालदेखि उम्मेदवार जिताउन सकेको छैन । कहिले उपविजेता त कहिले तेस्रो स्थानमै चित्त बुझाउँदै आएको छ । तर यसपटक एमाले जुम्लाका अध्यक्ष ६२ वर्षीय शान्तिलाल महतले विजेता बन्ने दौडमा आफ्नो उम्मेदवारी दर्ता गराएको बताउँछन् ।
एमाले जिल्ला कमिटीले सबैको समर्थनमा एकल सिफारिस भएको र नेता–कार्यकर्ताको अपार साथ भएकाले यसपटक विजेता भएर छाड्ने उनको दाबी छ । जुम्लाको चन्दननाथ नगरपालिका–७ महतगाउँमा स्थायी घर भएका महत यसअघि सामाजिक सेवामा क्रियाशील थिए ।
मंगलबार मुख्य निर्वाचन कार्यालयमा उम्मेदवारी दर्ता गरेसँगै महतले नेता–कार्यकर्ता र समर्थकसँगको भेटघाट तीव्र पारेका छन् । उसो तर खलंगा आसपासका बस्तीमा घरदैलो गरेर मत मागिरहेका छन् । सुरुदेखिको सक्रियता र विगतदेखि सिकेको पाठलाई सफलताको सूत्रका रूपमा अघि सारेका महत अनेक एजेन्डा लिएर मतदाताको मन जित्ने कसरतमा लागेको बताउँछन् ।
एमाले जुम्लाले २०५६ सालको निर्वाचनमा देवीलाल थापालाई यहाँबाट जितायो । त्यहाँदेखि भएका कुनै पनि चुनाव आफ्नो अनुकूल बनाउन सकेको छैन । आन्तरिक कलह तीव्र हुनु र नेता–कार्यकर्तामा एकरूपता नहुनुले पराजित हुनुपरेको एमालेका समर्थकहरू बताउने गर्छन् । ‘पार्टीभित्रको अन्तरसंघर्ष मात्र रोक्न सके पनि महत विजेता बन्ने निश्चित छ,’ एक एमाले कार्यकर्ताले भने ।
२०६४ सालको चुनावमा एमालेका नेता डिल्लीबहादुर महत उम्मेदवार बने । उतिबेला तत्कालीन नेकपा माओवादीको जगजगी भएकाले उनी तेस्रो स्थानमा धकेलिए । जुम्लामा उनी एमालेभित्र प्रभावशाली नेता मानिन्थे । २०७० सालको चुनावमा पदम रोकायालाई उम्मेदवारका रूपमा अघि सार्यो । उनी दोस्रो स्थान ल्याउन सफल भए ।
२०७४ सालमा नेकपा माओवादी र एमाले मिलेर नेकपा बन्यो । माओवादीका गजेन्द्रबहादुर महतले गठबन्धनको उम्मेदवार पाए । एमालेले उम्मेदवार नपाउने अवस्थामा महतलाई सहयोग गर्यो । २०७९ सालमा नेकपा एमालेका केन्द्रीय सदस्य रतननाथ योगी चुनावमा प्रत्यक्ष उम्मेदवारका रूपमा मैदानमा होमिए । उनी तेस्रो स्थानमा थन्किए । राप्रपाका ज्ञानबहादुर शाही विजय बने ।
यी सबै चुनावबाट पाठ सिक्दै यसपटक शान्तिलाल महतलाई एमालेले चुनावी मैदानमा पठाएको छ । महतले राष्ट्रियता विरोधी, भौतिक संरचना जलाउनेदेखि हिंसात्मक कार्यका विरुद्धमा आफ्नो उम्मेदवारी रहेको बताउँदै आएका छन् । देशमा राजनीतिक स्थिरता कायम गर्न र सुखी नेपाली, समृद्ध नेपाल साकार पार्न पनि नेपाली जनताले एमालेलाई पहिलो पार्टीका रूपमा देख्न चाहेको उनको तर्क छ ।
२०३८ सालदेखि नेमकिपाबाट भूमिगत रूपमा पार्टी सदस्यता प्राप्त गरेका महत २०४७ मा नेकपा माले हुँदै नेकपा एमालेको राजनीतिमा लागेका हुन् । वडाध्यक्षदेखि सकुम्बासी आयोगको अध्यक्षसम्म हुँदै लामो समय गैरसरकारी संस्थामा लागेर उनले समाजसेवा गरेका छन् ।
२०७४ सालको स्थानीय तहको निर्वाचनमा चन्दननाथ नगर प्रमुखका रूपमा उम्मेदवारी दर्ता गरे । कांग्रेसकी कान्तिका सेजुवालसँग पराजित भए । उनी २०७७ देखि हालसम्म पार्टीको जिल्ला कमिटी अध्यक्ष छन् । निर्वाचनमा पहिलो बन्नका लागि मुख्य निर्वाचन अधिकृतको कार्यालयमा मनोनयन दर्ता गराएका नौ जना प्रतिस्पर्धीलाई पराजित गर्नुपर्ने चुनौती छ ।
अहिले मुख्य प्रतिस्पर्धीका रूपमा रहेका नेकपाका नरेश भण्डारी, कांग्रेसका दीपबहादुर शाही र राप्रपाका ज्ञानबहादुर शाहीले भन्दा धेरै मत ल्याउनुपर्नेछ । जसका लागि नरम प्रचार शैली, मतदाताको मन जित्ने एजेण्डा तर्जुमा गरेर बस्तीमा प्रवेश गर्नुबाहेकको विकल्प नरहेको महत स्वयं पनि स्वीकार्छन् । ‘जुम्लामा एमाले पहिलो पार्टी हो । तर पार्टीभित्रका प्राविधिक कमजोरी चुनाव हराउने साधन बनिरहेको छ । यस पटकको चुनावमा त्यो हुन दिन्नौं,’ महतले भने, ‘यसपटक चुनाव जितेर लामो समयदेखि गुमेको साख फिर्ता ल्याउने अभियानमा छौं ।’
