सुर्खेत — सुर्खेतको वीरेन्द्रनगरस्थित मानिकेज ऊर्जा पसलमा सोमबार दिउँसो लागेको आगो नियन्त्रण गर्न सकस भएको छ । वीरेन्द्रनगर–३, जुम्ला रोडस्थित पसलमा आगलागी भएको चार घन्टा बिते पनि नियन्त्रण गर्न सकिएको छैन । 

आगो नियन्त्रण गर्न खटिएको सेनाको राजदल गणका गणपती भद्रबहादुर सिंह ठकुरीले बिजुलीको काम गर्ने क्रममा सर्ट भएर आगो लागेको बताए । पसलभित्र टायर, रबर र छिटो आगो सल्किने वस्तु रहेकाले नियन्त्रण कठिनाई भइरहेको बताए । 

उनका अनुसार उपसेनानी मनोज कुँवर र प्रहरी निरीक्षक राजन भट्टराइको टोलीले जलिरहेको घरबाट वीरेन्द्रनगर–६, कि ७० वर्षीया तुलसी भुषालको उद्धार गरेको थियो । भवनको चौथो तलाबाट बेहोस अवस्थामा बृद्धाको उद्दार गरिएको थियो । उद्धार गर्न भवनको भित्ता फोड्नु परेको थियो ।