डोल्पा — हिमाली जिल्लाका स्थानीय तहदेखि सरकारी कार्यालयमा प्रमुख र अन्य कर्मचारी नटिक्दा कामकाज प्रभावित भइरहेको छ । सरुवा गरेर जिल्लामा आउन नमान्ने र केही गरी आइहाले पनि धेरै समय नटिक्ने कर्मचारीका कारण सेवाग्राही मारमा छन् ।

यहाँको त्रिपुरासुन्दरी नगरपालिका अहिले कार्यालय प्रमुखविहीन छ । गत मंसिरमा सुर्खेतमा आयोजित कार्यशालामा सहभागी हुन गएका तत्कालीन प्रमुख प्रशासकीय अधिकृत नोखिराम वली जिल्ला फर्किएनन् । पुस पहिलो साता सरुवा भइसकेको जानकारी गराएर उनी फर्किएनन् । राय सल्लाह नलिई मन्त्रालयले वलीको काभ्रेको पनौती नगरपालिकामा सरुवा गरेपछि स्थानीय तहको कामकाज ठप्प भएको जनप्रतिनिधिको गुनासो छ ।

उक्त पालिकाका जनप्रतिनिधिले मन्त्रालयसँग परामर्श गरेर त्यहाँ कार्यरत वरिष्ठ कर्मचारीलाई निमित्त कार्यालय प्रमुख बनाउन खोजेका थिए । उनीहरूले कृषि शाखामा कार्यरत कृषि विकास अधिकृत दीपेन्द्र ऐडीलाई प्रमुख बन्न अनुरोध गरेका थिए । तर, एडीले जनप्रतिनिधिको प्रस्ताव अस्वीकार गरे । त्यसपछि अर्का वरिष्ठ कर्मचारी इन्जिनियर चन्द्रशेखर वली र जनस्वास्थ्य अधिकृत थानेश्वर पनेरुलाई पालैपालो निमित्त प्रमुखको जिम्मेवारी सम्हाल्न अनुरोध गरे पनि मानेनन् ।