जुम्ला — गत भदौ २४ गते जेनजी प्रदर्शनका क्रममा चन्दननाथ नगरपालिकामा तोडफोड भएको दमकल अझै मर्मत हुन सकेको छैन । दमकल मर्मत नहुँदा आगलागी भइहाल्यो भने नियन्त्रणमा लिन कठिन हुने अवस्था छ । तीन महिनादेखि दमकल थन्किएको छ ।

आन्दोलनका क्रममा एम्बुलेन्स, शववाहन, जनप्रतिनिधि कर्मचारीले चढ्ने गाडी र दमकल तोडफोड भएका थिए । जनप्रतिनिधि र कर्मचारी चढ्ने सवारी र एम्बुलेन्स, शववाहन मर्मत भएर सञ्चालनमा आए पनि दमकल अझै मर्मत हुन सकिरहेको छैन । 

रावल वर्कसपका सञ्चालक विन्दास रावलले एक हप्ताअघि मात्रै दमकल मर्मतका लागि ग्यारेज पठाएको बताए । ‘दमकलको अगाडिको सिसा हालिसकिएको छ,’ रावलले भने, ‘केही सामान मगाउनुपर्ने भएकाले ढिलो भएको हो । तर अबको एक हप्तामा दमकल मर्मत भइसक्नेछ ।’

दमकलजस्तो अति संवेदनशील साधन मर्मतमा ढिला गरेको भन्दै स्थानीय आक्रोशित भएका छन् । जनप्रतिनिधिले एम्बुलेन्स, शववाहन र दमकल मर्मतलाई प्राथमिकतामा राख्नुपर्ने स्थानीय हर्कबहादुर रोकायाले बताए । ‘तर नगरप्रमुख र उपप्रमुखले आफू चढ्ने गाडी मात्रै चाँडै बनाइहाले,’ उनले भने, ‘सार्वजनिक सरोकार राख्ने साधनमा लापरबाही देखियो ।’

आगो नियन्त्रण गर्नेजस्तो संवेदनशील अवस्थामा प्रयोग हुने दमकल अझै नबन्नु दुर्भाग्यपूर्ण भएको स्थानीयको गुनासो छ । ‘जनप्रतिनिधिहरू नागरिकको सेवाभन्दा आफ्नै लाभतिर केन्द्रित बने,’ चन्दननाथ–६ का धनबहादुर थापाले गुनासो गरे ।