जुम्ला — जुम्ला सिंजा गाउँपालिका-६ की जडेनी रावतको तल्लोपेट दुख्ने, छाती दुख्ने समस्या धेरै पहिलेदेखि थियो । तर आर्थिक अभावका कारण खलंगासम्म पुगेर उपचार गराउन निकै कठिन थियो ।

न खलंगा पुग्ने आर्थिक जोहो भइसकेको थियो न त अस्पतालमा गएर उपचार गराउने अवस्था नै थियो । रोग पालेर गाउँमै बस्नुबाहेकको विकल्प थिएन । तर मंगलबार कर्णाली स्वास्थ्य विज्ञान प्रतिष्ठान शिक्षण अस्पताल जुम्लाको विशेषज्ञ टोली गाउँमै पुगेर उपचार गर्न थालेपछि उनी उत्साहित भइन् । उनले खुलेरै स्वास्थ्य समस्या राखिन् । चिकित्सकले रोगअनुसारको औषधि र परामर्श दिए । उनले भनिन्, ‘गाउँमा बिरामी पर्दा अस्पताल सम्म जान सक्दैनौं । अहिले डक्टर आएपनि सहज भयो ।’

सिंजा-६ कै गोरी बुढाको लामो समयदेखि टाउको दुख्ने समस्याले सताइरहेको थियो । घरायसी औषधि गर्नसम्म गरिन् । तर निको नभएपछि उनी झन‌् बिरामी हुँदै गइन् । योनिबाट सेतोपानी बग्ने, पेट पोल्ने समस्या पनि थियो । तर गाउँमा पुगेको स्त्रीरोग विशेषज्ञको टोलीले उनको उपचार गरिदियो । 

सामान्य स्वास्थ्यकर्मी भेटाउनसमेत मुस्किल पर्ने गाउँमा विशेषज्ञ चिकित्सक नै आएर उपचार गरिदिँदा उनी मक्ख छिन् ।

डाक्टरको टोली गाउँमा आइपुगेको जानकारी पाएपछि उब्जी बुढा हतारहतारमा भेट्न आइपुगिन् । उनी लामो समयदेखि पाठेघरको समस्या भोगिरहेकी छिन् । 'बजार टाढा छ । मालपाखर हेर्ने मान्छे नहुँदा अस्पताल जान सकिएको छैन,' उनले भनिन्, ‘सबै रोग हेर्ने डाक्टरसाप गाउँमै आएपछि सजिलो भयो ।'