जुम्ला — जुम्लाको तातोपानी गाउँपालिका–६ धौलापानीमा धौलापानी लिफ्ट सिँचाइ निर्माण भएपछि बाँझो जमिनमा खेती गर्न सुरु भएको छ । सिँचाइ नहुँदा झण्डै साढे ७ हेक्टर जमिन बाँझो थियो । अहिले तिला नदीको पानी लिफ्ट गरेर खेतबारीमा पुगेपछि स्याउ बगैंचा निर्माण, मौसमी तथा बेमौसमी खेतीका साथै जौ, गहुँ र सिमी लगाउन सुरु भएको छ ।

धौलापानी लिफ्ट सिँचाइ परियोजनाको सोमबार नर्बेजियन राजदूत डाग्नी म्योस र तातोपानी गाउँपालिका अध्यक्ष नन्दप्रसाद चौलागाईंले संयुक्त रूपमा उद्घाटन गरे । तातोपानी गाउँपालिका अध्यक्ष चौलागाईंले लिफ्ट सिँचाइ तातोपानीको समृद्धिसँग जोडिएको प्रतिक्रिया दिए । 

अहिले सिँचाइ हुँदा स्याउ बगैंचा व्यवस्थापनको काम सुरु भएको छ । किसानहरू ग्रीन हाउस बनाएर तरकारी खेती गर्न थालेका छन् । स्थानीय भक्तबहादुर विष्टले सिँचाइ पुगेपछि खोलादेखि गाग्रीमा पानी बोकेर सिँचाइ गर्नुपर्ने बाध्यता हटेको बताए । उनले भने, ‘पहिले जग्गा बाँझो थियो । स्याउ बगैंचा स्थापना गर्न चाहने किसानले खोलादेखि पानी बोकेर सिँचाइ गरिरहेका थिए । तर अहिले खेतबारीमै पानी पुगेको छ । किसानलाई निकै राहत मिलेको छ ।’

पहिले कम उत्पादन लिइरहेका किसानहरू अब बढी उत्पादन लिन पाइने आशमा छन् । पानीको स्रोत नहुँदा सुख्खा भइरहने जग्गा अब हरियाली हुनेछ ।