जुम्ला — भदौ २४ गते राति जुम्ला कारागारबाट भागेका ४१ जना कैदीमध्ये ११ जना अझै फर्किएका छैनन् । जिल्ला प्रहरी कार्यालय जुम्लाको तथ्यांकअनुसार ३० जना कैदी फर्किइसकेका छन् । फर्किएकामध्ये ५ जना कैदी प्रहरीले २४ गते राति नै नियन्त्रणमा लिइसकेको थियो । 

अहिले प्रहरीले फरार रहेका कैदीको खोजी कार्य तीव्र पारेको जनाएको छ । पहिलो चरणमा सहजै रुपमा फर्किन आग्रह गरेको जुम्ला प्रहरी पछिल्लो समयमा निकै कडा रुपमा प्रस्तुत भएको हो । 

डीएसपी रविनबाबु रेग्मीले हरेक चौकीमा फरार कैदीको हुलिया पठाइसकेको बताए । उनले भने, ‘ भागेका कैदीहरु फर्किन्छन् कि भन्ने आशामा बसेका थियौं । यदि समयमै फर्किएनन् भने उनीहरुलाई प्रहरीले नियन्त्रणमा लिएर ल्याउनुपर्ने देखिन्छ ।’