कालिकोटमा स्काभेटर र जेसीभीले पहिरो पन्छाउन प्रयास गर्दा पनि लगातार पहिरो झर्दा सडक खुलाउन चुनौतीहरू थपिएका छन्।
What you should know
कालिकोट — कालिकोटको शुभकालिका–१ गगने खोलामा पुनः पहिरो झरेर कर्णाली राजमार्ग पूर्ण रूपमा अवरुद्ध भएको छ । गगने खोला पारीपट्टीको डाँडा पूरै खसेको छ ।
पहिरो पन्छाउन स्काभेटर र जेसीभी गरी दुईवटा मेसिन लगाइए पनि लगातार पहिरो झर्दै रहेकाले काम गर्न कठिन भएको कालिकोटका प्रहरी प्रमुख टेकबहादुर रावतले बताए । ‘तल दुईवटा मेसिनले फाल्दै छन्, तर माथिबाट झरिरहेको छ,’ उनले भने ।
वर्षा हुनेबित्तिकै लेदो र ढुङ्गासहित झर्ने पहिरोले यात्रुलाई सास्ती दिने गरेको छ । गएरातिको वर्षाले रातिदेखि झरेको पहिरो बिहान पन्छाउन सुरु गरिएको जिल्ला प्रहरी कार्यालयका सूचना अधिकारी वीरबहादुर सुनारले जानकारी दिए । ‘हिजो बेलुकीदेखिको वर्षाले बिहान पहिरो गएको हो,’ उनले भने, ‘पहिरो पन्छाउन जेसीभी मेसिन लगाइए पनि सडक खोल्न सकिएको छैन ।’
सडक अवरुद्ध भएपछि सुर्खेत जाने गाडी ठाउँ–ठाउँमा रोकिएका छन् । उनका अनुसार असारयता २८ पटक गगनेमै पहिरो झरेर ३७ दिन सडक अवरुद्ध भएको छ ।
‘पहिरोले सडक अवरुद्ध भएपछि भोकै बाटोमा बस्नुपरेको छ,’ सुर्खेत जान हिँडेकी शिक्षक, विजोसी मावि चौकीकी प्रधानाध्यापक पवित्रा शाहीले भनिन् । ‘कर्णाली राजमार्गले धेरै दुःख दियो । सुर्खेत टिचर्स ट्रेनिङमा जान लागेको, पुगिएला जस्तो छैन ।’
यहाँको पहिरोले कर्णालीबासीलाई धेरै सास्ती दिएकोले अछामको भानाकोट हुँदै खुलालु जोड्ने सडक निर्माण गर्नुपर्ने स्थानीयको माग छ ।
‘दिनहुँ झर्ने पहिरोले धेरै दुःख पाइयो,’ नरहरिनाथ गाउँपालिकाका प्रवक्ता प्रदीप बोहोराले भने, ‘वैकल्पिक मार्गका रूपमा दैलेखको राकम पुल तरेर अछामको चिल्ताडा–भानाकोट हुँदै खुलालु जोड्ने सडक खोल्नुपर्छ । पल्लो छालबाट सडक ल्याउन अछामको विनायक पञ्चदेवल नगरपालिका र नरहरिनाथ गाउँपालिकाले सहकार्य गरेर सरकारलाई दबाब दिनुपर्छ ।’
