प्रमुख प्रशासकीय अधिकृत टेकबहादुर बुढ्थापाले ९८ लाख ७३ हजार तीन सय ८३ रुपैयाँ बराबरको क्षति भएको बताए ।
What you should know
जुम्ला — जेनजी विद्रोहका क्रममा प्रदर्शनकारीहरुले गरेको तोडफोडमा एक करोड रुपैयाँ बराबरको क्षति भएको चन्दननाथ नगरपालिकाले जनाएको छ ।
यही भदौ २४ गते भएको जेनजी आन्दोलनका क्रममा नगरपालिकाको कार्यालय,सवारीसाधन र भौतिक संरचननामा तोडफोड गरिएको थियो । नगरपालिका कार्यालयकाअनुसार ५ वटा मोटरसाइकल जलाइएको थियो ।
प्रमुख प्रशासकीय अधिकृत टेकबहादुर बुढ्थापाले ९८ लाख ७३ हजार तीन सय ८३ रुपैयाँ बराबरको क्षति भएको बताए । उनका अनुसार केही सामान आगजनी गरिएको छ । केही तोडफोड गरेर कामै नलाग्ने बनाइएको छ । सबैभन्दा बढी ७९ लाख ७३ हजार मूल्य बराबरको सवारीसाधनमा क्षति पुर्याएको विवरण नगरपालिकामा छ । मेसिनरी तथा कार्यालयका सामग्रीहरु १३ लाख र अन्य ६ लाख बराबरको भौतिक संरचनामा क्षति भएको उनको भनाइ छ ।
नगरप्रमुख राजुसिंह कठायतले जेनजी आन्दोलनका नाममा नगरपालिकाले ठुलो क्षतिको सामाना गर्नुपरेको बताए । उनले भने, ‘कार्यालयका कुनै पनि झ्याल,ढोकाका सिसा छैनन् । सवारीसाधनमा उत्तिकै तोडफोड छ । कार्यालय प्रवेश गर्दा नै उदेग लागेर आउने गर्छ ।’
नगरपालिकाले संकलन गरेको विवरणअनुसार दमकल,एम्बुलेन्स,शववहान,डोजर,महिन्द्रा जिप,हाइलेक्स कार र स्कारपियोमा समेत तोडफोड भएको थियो । प्रदर्शनकारीहरुले घन,साबेल र ढुंगाले तोडफोड गरेका थिए । ११ वटा मोटरसाइकल र स्कुटरमा तोडफोड भएको थियो । यसैगरी, कार्यालयभित्र रहेका डेक्सटप कम्प्युटर, एलसीडी, एकीकृत सेवा प्रणालीको टोकन मेसिन, डिजिटल नागरिक वडापत्र, प्रिन्टर, वाटर डिस्पेन्सर, फर्निचर, नगर प्रहरीका सामग्रीलगायत पूर्णरुपमा नष्ट छन् ।
अहिले नगरपालिकाले प्रभावकारी सेवा सुरु गर्न सकेको छैन । नियमित सेवाहरू प्रभावित भएका छन् । क्षतिको एकिन विवरण संकलन गरी पुनर्निर्माण र सेवा सञ्चालन गर्ने प्रयास भइरहेको प्रमुख प्रशासकीय अधिकृत बुढ्थापाले जनाए ।
