कालीकोट — कालीकोटको शुभकालिका-१ गगने खोलाको पहिरोले कर्णाली राजमार्ग फेरि अवरुद्ध भएको छ। वर्षा हुने बित्तिकै लेदो र ढुङ्गासहित झर्ने पहिरोले यात्रुलाई सास्ती दिएको हो।

पहिरोले मंगलबार बेलुकी अवरुद्ध सडक बुधबार दिउँसो खुले पनि रातिको वर्षाले पहिरो झरेपछि पुन: अवरुद्ध भएको कालीकोटका डीएसपी टेकबहादुर रावतले बताए। 'फेरि गगनेमै पहिरो गयो,' उनले भने, 'यहाँको पहिरोले सारै सतायो।' उनका अनुसार असार यता २७ पटक गगनेमै पहिरो झरेर ३४ दिन सडक अवरुद्ध भइसकेको छ।

उनले पानी रोकिएपछि दिउँसोसम्म सडक खुल्ने बताए। यहाँको पहिरोले कर्णाली बासीलाई निकै सास्ती दिएकोले अछामको भानाकोट हुँदै खुलालु जोड्ने सडक निर्माण गर्नु पर्ने नरहरिनाथ गाउँपालिकाका प्रवक्ता प्रदीप बोहोराले बताउँछन्।