जुम्ला — कर्णाली राजमार्गको सुर्खेत-जुम्ला खण्डस्थित गगनेखोलामा पुनः पहिरो गएको छ । पहिरो पन्छाएको पाँच घण्टामै पहिरो आएर सडक यातायात ठप्प भएको हो । 

डिभिजन सडक कार्यालय जुम्लाले पहिरोले सडक पुनः अवरुद्ध भएको जनाएको छ । पाँच घण्टामा रोकिएका सबै गाडीहरु गइसकेका छन् । तर फेरि पहिरो गएकोले सवारी आवागमनमा समस्या देखिएको छ । 

अहिले गगनेखोला क्षेत्रमा भीषण वर्षा भइरहेको छ । डिभिजन प्रमुख दीपेन्द्र चौधरीले सडकमा लेदोसहितको पहिरो आइरहेको बताए । 'तत्काल पन्छाउन सकिने अवस्था छैन । तर बुधबार बिहानदेखि पहिरो पन्छाउने काम सुरु हुने छ,' उनले भने । चार दिनदेखि पहिरो पन्छाउन नसकिएका कारण स्याउ बोकेका २३ वटा ट्रक रोकिएका थिए ।