जुम्ला — बजेट संशोधनको माग गर्दै जुम्लाको सिंजा गाउँपालिकामा गत बुधबारदेखि लागेको ताला खुलेको छ । चार जना वडाध्यक्षको नेतृत्वमा ताला लागेको थियो ।

आइतबार गाउँपालिका अध्यक्ष पूर्णप्रसाद धितालको अध्यक्षतामा बसेको वडाध्यक्षहरु, सबै दल र संघर्ष समितिका पदाधिकारीबीचको बैठकले पालिकामा लागेको ताला खुलाउने निर्णय गरेको हो । बैठकले सात वटा निर्णय गरेको छ । सिंजा २ मा विनियोजन भएको सडकको १४ लाख ६३ हजार एक सय ४ रुपैयाँको बजेट ६ वटै वडाध्यक्षको संयुक्त अनुगमन प्रतिवेदन कार्यालयमा पेस भइसकेपछि मात्र भुक्तानी प्रक्रिया अघि बढाउने निर्णय भएको छ । 

सिंजा २ र ३ स्थित रनुखाना कोटेसाँघु बेलिब्रिज पुलको तत्काल गाउँपालिकाले बोलपत्र आह्वान गर्ने, लागत अनुमान बमोजिम अपुग हुने रकम केन्द्रीय सरकारसँग माग गर्ने र त्यसका लागि सर्वदलीय संयन्त्र तयार गर्ने निर्णय भएको हो । यदि यति गर्दा पनि बजेटको व्यवस्था हुन नसकेमा पालिकाको रकम व्यवस्थापन गर्ने भनिएको छ । 

चालु आर्थिक वर्षको बजेट आयोजना र कार्यक्रम संशोधन गर्नुपरेमा पालिकाको विधायन अधिवेशनमा छलफल गर्ने र सडक ग्राभेल गर्न प्रयोग हुने डोजर र टिपर भाडाका लागि विनियोजन भएको बजेट अपुग भएमा व्यवस्थापन गर्ने निर्णयसमेत भएको प्रमुख प्रशासकीय अधिकृत टेकबहादुर शाहीले जानकारी दिए ।