४४ वर्षीय जनबहादुर शाही बाढीपछि सम्पर्कविहीन हुँदा परिवारले खोजीकार्यमा सहयोगको लागि आग्रह गरेको छ।
जुम्ला — गत साउन २० गते भारतको उत्तराखण्डको उत्तरकाशी जिल्लाको धराली क्षेत्रमा गएको बाढीमा परेर जुम्लाका एक जना सम्पर्कविहीन छन् । दुईजना घाइते अवस्थामा छन् ।
तिला गाउँपालिका–३ का ४४ वर्षीय जनबहादुर शाही सम्पर्कविहीन भएका हुन् । उनको खोजी कार्यमा सहयोग गर्न परिवारले आग्रह गरेको छ । बाढी गएको एक साता बित्दा पनि उनको अत्तोपत्तो छैन ।
यति लामो समयसम्म परिवारको सम्पर्क बाहिर रहेपछि परिवार चिन्तित छन् । अघिपछि सम्पर्क भइरहने शाहीसँग एकाएक सम्पर्क विच्छेद भएपछि परिवारले खोज तथा उद्धारमा आवश्यक सहयोग गर्न माग गरेको छ ।
बेपत्ता भएका शाही धरालीमा होटल चलाइरहेका थिए । तिला गाउँपालिका ३ को वडा कार्यालयले हराइरहेका शाहीको खोजी कार्यका लागि जिल्ला प्रशासन कार्यालयमा अनुरोध पत्र पठाएको छ । पत्रमा साउन २० देखि उनी हराइरहेको उल्लेख छ ।
तिला गाउँपालिका ५ का वडाध्यक्ष ललितबहादुर शाहीले धराली पहिरोमा परि २ जना घाइते भएको जानकारी प्राप्त भएको बताएका छन् । उनले तिला गाउँपालिका ५ का वीरेन्द्रबहादुर शाही र यज्ञ विक्रम शाही घाइते अवस्थामा छन् । वीरेन्द्रबहादुरको देरादुन एनसी अस्पतालमा र यज्ञको देरादुन भारतीय सैनिक व्यारेकमा उपचार भइरहेको छ ।
वडाध्यक्ष ललितबहादुर शाहीले भने, ‘वीरेन्द्रबहादुरको टाउको फुटेर गम्भीर चोट लाग्नुको साथै दायाँ हात दुई ठाउँमा भाँचिएको छ । यज्ञको पनि शरीरका धेरै ठाउँमा चोटपटक लागेको जानकारी आएको छ ।’
