जुम्ला — जुम्लाको तातोपानी गाउँपालिकाले किसानलाई गुणस्तहीन गँड्यौंला मल बाँडेको भन्दै किसान आक्रोशित भएका छन् ।गँड्यौंला मलका नाममा रातो माटोजस्तो मल दिएपछि किसान सशंकित भएका हुन् ।

गत आर्थिक वर्ष जनतासँग उपाध्यक्ष कार्यक्रम शीर्षकमा किसानलाई मल दिन थालिएको थियो । चितवनस्थित दिव्य अर्गानिक फर्टिलाइजर कम्पनीले मल उपलब्ध गरेको थियो । कम्पनीले लामो समय स्टोर गरेको मल दिएको भन्दै किसानहरु आक्रोशित बनेका हुन् ।

'मल दुई वर्ष अघिदेखि गाउँपालिका कार्यालय नजिकै स्टोर गरेर राखेको थियो,' कम्पनीको जुम्ला सम्पर्क व्यक्ति भैरव कठायतले भने, ‘साउन ७ देखि बाँड्न सुरु भयो । रातो माटोजस्तो मल देखिएपछि किसानहरु समस्यामा परेका हुन् ।’ 

कम्पनीका सञ्चालक नरेन्द्र गिरीले २०७४ सालदेखि एक लाख किलो मल जुम्लामा आइपुगेको बताए । उनले लामो समय स्टोर गरेर राखेको मल गुणस्तरहीन नहुने तर हावा र पानी छिरेपछि मलले काम गर्न नसक्ने बताए ।