भैंसीको दानापानी राम्रो पाइने र पुर्खादेखि नै वर्षायाममा गुठीचौर पाटनमा चरनका लागि जाजरकोटका भैंसी ल्याउने चलन छ । घरदेखि झन्डै ९ दिन लगाएर भैंसी ल्याएको उनले बताए । ‘गुठीचौर हेर्नलाई मात्र सुन्दर छैन । चरिचरनका हिसाबले उत्तिकै भरिलो छ,’ उनले भने । यसरी ल्याइएका भैंसी भदौ अन्तिमतिर मात्र फर्काउने गरिएको छ । अहिले गुठीचौर छेउछाउमा अस्थायी भैंसीगोठ देख्न सकिन्छ ।

४८ वर्षकी पन्नमती बुढा ६ भैंसी ल्याएर गुठीचौर पाटनमा शनिबार मात्र आइपुगिन् । बीचबाटोमा भैंसी चराउँदै ल्याउनुपर्ने भएकाले एक साताभन्दा बढी नै समय लागेको उनले बताइन् । अबको झन्डै तीन महिना गुठीचौर पाटनमै बस्ने उनको तयारी छ । त्यही अनुसार सामलतुमल बोकेर ल्याएको उनको भनाइ छ । 'तीन महिनाका लागि पुग्ने खाना, तरकारी, पिठो, चामल बोकेर आएका छौं,' उनले थपिन्, ‘हिउँदमा यहाँका भेडा जाजरकोट लैजान्छन् । वर्षायाममा हामी भैंसी ल्याएर जुम्लाको पाटनमा आइपुग्छौं ।’ उनका अनुसार किसानहरुले गुठीचौरमा भैंसी मात्र ल्याउँदैनन् । किसानहरु बीचमा पशुपालन क्षेत्रको अनुभव पनि आदानप्रदान हुने गरेको छ । कतिपय जुम्लाका किसानले भैंसी किनेर राख्ने गरेका छन् ।

जाजरकोट र जुम्लाबीचमा पर्ने चाखुरे लेक पार गरेर भैंसीलाई पाटन ल्याउने गरिएको छ । जाजरकोटवासीले ६० भन्दा धेरै भैंसी गुठीचौर पुर्‍याइसकेका छन् । यो समयमा झन्डै ४ सयभन्दा बढी घरले भैंसी ल्याउने गरेका छन् । 'यो हाम्रो पुर्खादेखिको चलन हो । यसलाई हाम्रो पिँढीले अहिले सम्म बचाइराखेको छ,’ ६१ वर्षीय परिकेरे बुढाले भने, ‘भदौ महिनाको अन्तिमतिर जाजरकोट फर्काउने गर्छौं ।'

जाजरकोटका भैंसी गुठीचौर पुगेसँगै चहलपहल बढेको छ । गाइभैंसीको दूध, दही, खीर खान र पाटनमा रमाउन आन्तरिक तथा बाहृय पर्यटक आउजाउ गरिरहेका छन् । दैनिकजसो ५ सयभन्दा धेरै मानिस ओहोरदोहोर गरिरहेको गोठालाहरु बताउँछन् । शनिबार र शुक्रबार त यहाँ भिड नै लाग्ने गरेको छ । जुम्ला खलंगादेखि डोल्पाको से फोक्सुण्डो जाने पर्यटक गुठीचौर हुँदै जाने भएकाले रमाइलो हुने गोठाला सुनाउँछन् ।गुठिचौर पाटनमा पाल टाँगेर पर्यटकहरु बसिरहेका भेटिन्छन् भने छाप्रो बनाएर भैंसी गोठालाहरु । गुठीचौर गाउँपालिका अध्यक्ष दानबहादुर बुढाले यहाँको सुन्दर पाटनले धेरैलाई लोभ्याउने बताए ।गाउँपालिकाले प्रत्येक भैंसीको पाँच सय रुपैयाँ कर लिने गरेको छ ।