वीरेन्द्रनगर — सत्तापक्ष र प्रमुख प्रतिपक्षी दलबीच सहमति नजुट्दा कर्णाली प्रदेशसभा बैठक अनिश्चित बनेको छ । माओवादीले योजना बैंकमा योजनाहरू समावेश नगरेरै बजेट ल्याउन खोजेको भन्दै बैठकमा सहभागी नहुने जनाएको छ ।
माओवादी संसदीय दलको बैठकले योजना बैंकमा समावेश योजनाहरू सार्वजनिक गर्नुपर्ने र संसदमा मुख्यमन्त्री यामलाल कँडेलले जनाएको प्रतिबद्धताअनुसार जिल्लाबाट सिफारिस भएका योजना पनि बजेटमा समावेश नहुँदासम्म संसद् बैठकमा उपस्थित नहुने निर्णय गरेको छ ।
तीन बजेका लागि तय गरिएको बैठक अनिश्चित बनेको छ । माओवादी उपस्थित नहुँदा कार्यव्यवस्था परामर्श समितिको बैठक पनि बस्न सकेको छैन ।
