सल्यान — जिल्लाको कपुरकोट गाउँपालिका ३ चोरखोलादेखि राम्री सडक खण्ड स्तरवृद्धि तथा कालोपत्रे गर्नका लागि आइतबारदेखि राप्ती राजमार्ग दैनिक छ घन्टा बन्द गरिएको छ । स्तरवृद्धि तथा कालोपत्रे गर्न सडक डिभिजन कार्यालय दाङ्ग, जिल्ला प्रशासन कार्यालय सल्यानले सूचना प्रकाशन गरेर आइतबारदेखि राप्ती राजमार्ग बन्द गरिएको हो । 

नियमित गाडी सञ्चालनका कारण राप्ती राजमार्गको चोरखोलादेखि राम्री सम्मको सडक खण्ड स्तरवृद्धि तथा कालोपत्रेको काम प्रभावित भएपछि आइतबार २५ गतेदेखि असार १ गतेसम्मका लागि आठ दिन दैनिक छ घन्टा बन्द गरिएको सडक डिभिजन कार्यालय दाङले जनाएको हो । 

चोरखोलादेखि राम्री खण्डमा सडक स्तरवृद्धिको काम भइहेपनि नियमित गाडी चल्दा ४ किलोमिटर सडक खण्डमा प्रभाबकारी तथा तोकेको समयमा काम हुन नसकेका कारण यात्रुले बाह्रै महिना विभिन्न किसिमका कष्ट उठाउँदै आएकाले आउँदा दिनमा सास्ती भोग्न नपरोस् भनेर नै सडक स्तरवृद्धि गर्न दैनिक छ घन्टा बन्द गर्नु परेको सडक डिभिजन कार्यालय दाङका प्रमुख दीपेन्द्रबहादुर विष्टले  बताएका छन् । उनले बिहान ११ बजेदेखि बेलुकी ५ बजेसम्म सडक बन्द हुने जानकारी गराए । वर्षात नलाग्दै स्तरबृद्धिको काम सम्पन्न गर्न यो भन्दा अघि पनि पटक पटक सडक बन्द गरेर काम गरिएको उनको भनाई छ । 

साना तथा अत्यावश्यक सवारी साधन वैकल्पिक मार्ग पैयाखोरिया–सातावास–किमचौर–कपुरकोट सडक खण्ड प्रयोग गर्न रे संयमता अपनाउन सडक डिभिजन कार्यालय दाङका प्रमुख विष्टले आग्रह गरेका छन् । वैकल्पिक मार्ग जोखिमपूर्ण भएकाले साना गाडी सहज रुपमा आउजाउका लागि दुई दिनसम्म मर्मत गरिएको उनले जानकारी गराए । ‘वैकल्पिक मार्ग साँगुरो भएकाले ठुला सवारी साधन चल्न सक्दैनन् । ठूला सवारी साधनमा सवार गर्ने यात्रु र मालवाहक गाडी भने केही घन्टा रोकिनु पर्ने हुन्छ’ उनले भने ।  

वर्षातको समयमा पहिरो जाने र सिमेन्ट फ्याक्ट्रीको चुनढुंगा बोक्ने टिपरका कारण निर्माण कम्पनीले काम गर्दै आएपनि सोचे अनुसार प्रगति नदेखिएपनि पछिल्लो समयमा कालोपत्रे गर्नका लागि ग्रेभल गरिसकेकाले आउजाउमा केही सहज भएको उनको भनाई छ ।