२०६४ सालमा १४ औं जिल्ला परिषद्ले जुम्लालाई अर्गानिक जिल्ला घोषणा गरिसकेको छ । ‘अर्गानिक जिल्लाको पहिचान कायम राख्न अनुदानको मल ल्याइएको हो,’ कार्यालय प्रमुख रामभक्त अधिकारीले भने, ‘अनुदानको जैविक मलले किसानलाई राहत मिलेको अनुभूति भइरहेको छ ।’ 

जैविक मल लिन एक सातादेखि नै कृषि विकास कार्यालयले सार्वजनिक सूचना जारी गरेको थियो । सूचनामा उल्लेखित समयभित्र दर्ता हुन आएका किसानलाई मल दिंदै आएको उनको भनाइ छ । सबै कागजात पुगेका किसान, कृषि फार्म, कृषक समूह तथा कृषि सहकारीलाई ५० प्रतिशत अनुदानमा मल दिइएको हो । 

जुम्लामा ३ सय ९६ बोरा जैविक मल आइपुगेको छ ।  प्रतिकिसानलाई ५० किलोदेखि ५ क्विन्टलसम्म मल दिने योजना रहेको कृषि विकास कार्यालयका प्रमुख अधिकारीले बताए । प्रतिबोरा २५ सय रुपैयाँ मूल्य पर्छ । तर किसानले १ हजार २ सय ५० रुपैयाँ जम्मा गरेमा मल पाउँछन् । 

बाँकी रहेको ५० प्रतिशत रकम कार्यालयले व्यहोर्छ । जैविक मल वितरण कार्यक्रमका लागि चालु आर्थिक वर्षमा ६ लाख ८० हजार रुपैयाँ विनियोजन भएको थियो । कार्यालयका अनुसार दुई दिनमा ३५ जना भन्दा बढी किसानले जैविक मल लिइसकेका छन्।