जुम्ला — नेपाली कांग्रेस जुम्लाले वैशाख र जेठ महिनामा परेको असिनाले पुर्याएको क्षतिमा राहत उपलब्ध गराउन माग गरेको छ । जिल्ला प्रशासन कार्यालय जुम्लामार्फत प्रधानमन्त्री कार्यालय र मुख्यमन्त्री कार्यालय सुर्खेतमा ध्यानाकर्षण पत्र बुझाउँदै कांग्रेसले असिनाले ८० प्रतिशत उत्पादन नष्ट गरेको जनाएको हो ।
'ठूलो असिना परी जुम्ली किसानहरुको खेतबारीमा भएको स्याउ लगायतका फलफूलहरु ८० प्रतिशत र भित्र्याउन लागिएको जौ, गहुँसमेत नस्ट भयो,' ध्यानाकर्षण पत्रमा भनिएको छ, 'किसानहरुको मुख्य आम्दानीको स्रोतहरूमा तुसारापात हुँदा निकै मर्कामा छन् । सरकारले प्रभावकारी अनुगमन गरेर राहतको व्यवस्थापन होस् ।’
कांग्रेस जुम्लाले स्याउ बिमाको राहत रकमसमेत किसानले पाउन नसकेको बताएको छ ।
'गत वर्षको बिमा रकम किसानले पाएका छैनन्,' कांग्रेस जुम्लाका कार्यबाहक सभापति कार्मा बुढाले भने, 'यो वर्ष पनि बिमा गरिएको छैन । जसले किसान मर्कामा छ । सरकारको यसमा ध्यानाकर्षण होस् ।’
बिमा कम्पनीहरूले के, कति, कारणले फलफूल बिमाको रकम नदिएका हुन् र बिमा के कति कारणले नगरेका हुन् ? त्यस्ता बिमा कम्पनीहरुलाई कारबाहीको दायरामा ल्याउनसमेत माग गरिएको छ ।
हालै परेको असिनाबाट पीडित जुम्ली किसानलाई आवश्यक राहतका लागि प्रधानमन्त्रीका ध्यानाकर्षण गरिएको छ । प्रमुख जिल्ला अधिकारी रामबहादुर शाहीले ध्यानाकर्षण पत्र प्रधानमन्त्री कार्यालय र मुख्यमन्त्री कार्यालयसम्म पठाउने बताए । उनले भने, 'असिनाले बालीनालीमा क्षति पुर्याएकोमा हामी दु:खी छौं । सबै मिलेर पीडितलाई राहत उपलब्ध गराउनु जरुरी छ ।'
