जुम्ला — यार्सा संकलनका लागि डोल्पा पाटनमा गएका जुम्लाका एक युवकको लेक लागेर मृत्यु भएको छ । गुठीचौर गाउँपालिका–१ मणिसाँघुका भीमबहादुर बोहराको बुधबार लेक लागेर मृत्यु भएको हो ।
डोल्पा जिल्लाको जगदुल्ला गाउँपालिका–१ जगदुल्ला मध्यवर्ती पाटनमा गएका बेला उनलाई लेक लागेको हो । लेक लागेर बिरामी भएका भीमबहादुरलाई घर ल्याउँदै गर्दा बाटोमै मृत्यु भएको चोत्रा प्रहरी चौकी इन्चार्ज रोहित रसाइलीले जानकारी दिए ।
बोहरालाई बुधबार दिउँसो २ बजे लेक लागेको थियो । उपचारका लागि घर ल्याउने क्रममा उनको मृत्यु भएको हो ।
डोल्पा पाटन यार्सा संकलनका लागि जेठ ५ गते नै खुलेको थियो । यार्सा संकलनका लागि जुम्लाका अधिकांश युवा अहिले पाटनतिर लागेका छन् ।
