डोल्पा — जिल्ला प्रहरी कार्यालय डोल्पामा हाजिर भएको नौ दिनमै डीएसपी हेमबहादुर केसी प्रहरी प्रधान कार्यालय नक्साल तानिएका छन् । प्रहरी नायब निरीक्षक (सई)माथि हातपात गरेको कसुरमा उनलाई हेडक्वार्टर तानिएको हो ।

यसअघि नक्सालमै कार्यरत डीएसपी केसी १५ वैशाखमा जिल्ला प्रहरी कार्यालय डोल्पामा हाजिर भएका थिए । हाजिर भएको आठ दिनमै मुद्दा फाँटमा पाँच वर्षदेखि कार्यरत सईलाई कुटपिट गरेपछि उनलाई हेडक्वार्टर तानिएको हो ।

सई रसाइलीसाग एकाएक विवाद भएको थियो । डीएसपी केसीले एक्कासि बोलाएर उनलाई अश्लील शब्द प्रयोग गरी गालीगलौज र कुटपिट गरेको प्रहरी स्रोतले जनाएको छ । प्रहरी हेडक्वार्टरले घटना थाहा पाएको भोलिपल्टै उनलाई हेडक्वार्टर तानेको हो ।

हेडक्वार्टरको आदेशपछि डीएसपी केसी सार्वजनिक बस चढी काठमाडौं लागेका थिए ।