डोल्पा — अज्ञात व्यक्तिले जाजरकोट जिल्लाको तल्नुबगरमा नेपाल टेलिकमको फाइबर तार काट्दा डोल्पामा अवरुद्ध भएको इन्टरनेट सेवा ३६ घण्टापछि सुचारु भएको छ ।
रुकुमपश्चिमको राडीज्युला हुँदै डोल्पा पुर्याइएको तार अज्ञात व्यक्तिले काटेपछि करिब दुई दिन इन्टरनेट सेवा अवरुद्ध भएको थियो । दूर सञ्चार कार्यालय जाजरकोटको टोलीले काटिएको फाइबर जोडेपछि सोमबार बेलुकी सात बजेमात्र सेवा सुरु भएको बताइएको छ ।
‘यस पटकलाई दुई पटक फाइबर इन्टरनेटको तार काटियो । व्यक्ति पहिचान हुन भनेको सकेको छैन,’ दूर सञ्चार कार्यालय डोल्पाका प्राविधिक नवराज भट्टराईले भने, ‘पटक–पटक सेवा अवरुद्ध हुँदा सरकारी कामगाजमा पनि समस्या हुन्छ । दूर सञ्चारको सेवाप्रति सेवाग्राहीको विश्वास घट्न सक्छ, त्यसैले दोषी पत्ता लगाइ कानुनी कारबाही गर्नुपर्छ ।’
सोमबार बिहान इन्टरनेट अवरुद्ध हुँदा कक्षा १२ को परीक्षासमेत प्रभावित भएको थियो । सात बजे नै हलमा प्रवेश गराइएका परीक्षार्थीलाई ढिलो गरी प्रश्नपत्र बाँडिएको थियो ।
