सल्यान — जिल्लाको कपुरकोट गाउँपालिका–३ चोरखोलादेखि राम्री सडक खण्ड स्तरवृद्धि तथा कालोपत्रे गर्नका लागि सोमबारदेखि राप्ती राजमार्ग दैनिक पाँच घण्टा बन्द गरिएको छ ।

स्तरवृद्धि तथा कालोपत्रे गर्न सडक डिभिजन कार्यालय दाङले सूचना प्रकाशन गरेर सोमबारदेखि राप्ती राजमार्ग बन्द गरिएको हो । नियमित गाडी सञ्चालनका कारण राप्ती राजमार्गको चोरखोलादेखि राम्रीसम्मको सडक खण्ड स्तरवृद्धि तथा कालोपत्रेको काम प्रभावित भएपछि सोमबार ८ गतेदेखि १४ गतेसम्मका लागि एक सातासम्म दैनिक पाँच घण्टा बन्द गरिएको सडक डिभिजन कार्यालय दाङले जनाएको हो ।

चोरखोलादेखि राम्री खण्डमा सडक स्तरवृद्धिको काम भैरहे पनि नियमित गाडी चल्दा ४ किलोमिटर सडक खण्डमा प्रभावकारी हुन सकेको छैन । यात्रुले बाह्रै महिना विभिन्न किसिमका कष्ट उठाउँदै आएकाले आउँदा दिनमा सास्ती भोग्न नपरोस भनेर नै सडक स्तरवृद्धि गर्न दैनिक पाँच घण्टा बन्द गर्नु परेको सडक डिभिजन कार्यालय दाङका प्रमुख दीपेन्द्रबहादुर विष्टले  बताएका छन् ।