सुर्खेत — सीमित साधन र स्रोतका बाबजुद पनि नेपाल प्रहरीको कार्यकुशलता देख्दा खुसी लाग्ने गरेको कर्णाली प्रदेशका मुख्यमन्त्री यामलाल कँडेलले बताएका छन् ।

वीरेन्द्रनगरमा सुरु भएको प्रदेशस्तरीय अपराध अनुसन्धान समीक्षा गोष्ठीमा बोल्दै कँडेलले राजनीतिक परिवर्तनपछि राज्य व्यवस्थाप्रति नागरिकका अपेक्षा र महत्वाकांक्षा बढेकाले अधिकारमुखी अवधारणा विकास भएको बताए ।

‘समाजमा चेतना र अधिकारको यो अभिवृद्धिसँगै अपराध अनुसन्धान, अभियोजन र न्याय सम्पादन प्रक्रियामा नागरिक सहभागिता र निगरानी पनि बढेको छ,' उनले भने, ‘पछिल्लो समय कसुरका प्रकार र संख्या बढेको छ । कसुरको प्रकृति र प्रवृत्ति फेरिएसँगै प्रहरीले अपराध अनुसन्धान अभियोजनलाई वैज्ञानिक र वस्तुगत प्रमाणमा आधारित बनाउनुपर्ने दायित्त्व बढेको छ । यो नेपाल प्रहरीको प्रमुख जिम्मेवारी पनि हो र यसलाई संगठनले अवसरको रुपमा लिनुपर्दछ ।’ 

अपराधमा आएको स्वरुपको सुक्ष्म सर्वेक्षण गरी फौजदारी कानुनमा सुधारका लागि यससँग सम्बद्ध निकायहरुबीच सहकार्यको अझ बढी आवश्यकता देखिने उनको भनाइ छ । उनले भने, ‘तपाईंहरुको साहस र समर्पणले मात्र होइन, तपाईंहरूको नैतिकता र इमान्दारिताले पनि हाम्रो समाजमा ठूलो परिवर्तन सम्भव छ ।’