जुम्ला — गत वर्षको कात्तिक महिनामा गएको भूकम्पले भत्किएको भवन निर्माण नहुँदा तातोपानी–५ स्थित दुर्गा माध्यमिक विद्यालय लाम्राका विद्यार्थी प्रभावित भएका छन् । उनीहरूलाई कक्षाकोठा अभावका कारण चौरमा बसालेर पढाउन बाध्य भएको विद्यालयले जनाएको छ ।
अहिले भूकम्पले भत्किएका र चर्किएका भवन देख्दा विद्यार्थीहरू डराउनुपर्ने अवस्था देखिएको विद्यालय व्यवस्थापन समितिका अध्यक्ष आदीप्रसाद न्यौपानेले बताए । ‘विपद् प्राधिकरणमा भूकम्पले पुर्याएको क्षतिको बारेमा कागजात पेस गरेका छौं तर अहिलेसम्म कुनै सुनुवाइ भएको छैन,’ उनले भने, ‘जसले गर्दा यहाँ अध्ययनरत १ सय ५० भन्दा बढी विद्यार्थी खुला चौरमा बसेर पढ्न बाध्य छन् ।’
उनले अहिले कक्षा ५, ६, ७ र ८ का विद्यार्थी कक्षाकोठा अभावमा चौरमा बसेर पढिरहेको पनि बताए । ‘जस्तापाताले छाएका भवन हेर्दा टन्न छन् । तर भूकम्पले चर्किएको र भत्किएकाले बस्नलायक छैनन्,’ अध्यक्ष न्यौपानेले भने, ‘भवन हेरेर हुँदो रहेनछ । सुरक्षित भवन र निर्धक्क पठनपाठनले मात्र गुणस्तरीय शिक्षा दिन सकिने रहेछ ।’
गत वर्ष सामाजिक विकास कार्यालयको सहयोगमा ४ कोठे भवन निर्माण सुरु भएको थियो, जुन अहिलेसम्म पनि निर्माणाधीन अवस्थामा रहेकाले विद्यार्थीलाई राखेर पढाउन सकिएको छैन । यस वर्ष सहरी विकास मन्त्रालयअन्तर्गत दुईकोठे भवनका लागि बजेट आइपुगेको छ । 
भूकम्पले भत्काएका भवन पुनः निर्माणका लागि प्राधिकरणले अहिलेसम्म बजेटको व्यवस्था गर्न सकेको छैन । प्रधानाध्यापक प्रेमबहादुर शाहीले भूकम्पले भत्काएको भवन निर्माणका लागि कागजात सबै पठाइसकेको बताए । ‘अहिलेसम्म बजेट आइपुगेको छैन,’ उनले भने, ‘कहिले बजेट आएर भत्किएको भवन हटाउने वा बनाउने हो, त्यो पनि यकिन छैन ।’
अहिले शिक्षक, अभिभावक र विद्यार्थीले भवन निर्माण गरेर सुरक्षित रूपमा पठनपाठन गर्न पाउने विद्यार्थीको अधिकार सुनिश्चित गर्न माग गरेका छन् ।
दुर्गा माध्यमिक विद्यालय लाम्रामा बाल विकासदेखि कक्षा १२ सम्मको अध्ययन हुन्छ ।
