रुघाखोकी र ज्वरोका बिरामी बढेपछि स्वास्थ्य संस्थामा उपचारका लागि आउने बिरामीको संख्या बढेको ढाकाडाम स्वास्थ्य चौकीका इन्चार्ज तथा स्वास्थ्यकर्मी दीपक चन्दले बताए । पहिला दैनिक १५/१६ जना बिरामी आउने स्वास्थ्य संस्थामा अहिले दैनिक ३० जनासम्म पुग्ने गरेको र त्यसमा सबैभन्दा बढी रुघाखोकी, ज्वरो, निमोनिया र दमका बिरामी हुने गरेको उनले जानकारी गराए । उपचारका लागि दैनिक धेरै बिरामी आउने गरे पनि जटिल समस्या भने नदेखिएको र कडा निमोनिया भएकालाई जिल्ला अस्पताल सल्यान एवं मिसन अस्पताल चौरजहारी पठाउने गरेको उनले बताए । 

भल्चौर स्वास्थ्य चौकीका इन्चार्ज यज्ञबहादुर बुढाथोकीले भाइरल ज्वरो र रुघाखोकीका बिरामी बढे पनि महामारीको रूप भने नलिएको बताए । दिन प्रतिदिन बढ्दै गएको चिसो र समयअनुसार लगाउने कपडा, खानपिनको व्यवस्था गर्न नसकेकै कारण बालबालिका वृद्धवृद्धामा ज्वरो, रुघाखोकी, दमको समस्या बढी देखिएको उनले जानकारी गराए । ‘गाउँघरमा काम नगरी खान–लाउन पुग्दैन । बिहान उठ्ने बित्तिकै चिसो नभनी घाँस दाउरा, मेलापात गर्नुपर्छ,’ उनले भने, ‘त्यही भएर बच्चादेखि बुढापाकासम्म विभिन्न रोगको सिकार हुँदै आएका छन् ।’ 

जिल्लाका अन्य पालिकामा भने छिटफुट दुई/चार जनामा रुघाखोकीको समस्या देखिए पनि चिसोकै कारण ज्वरो र निमोनियाको समस्या भने नदेखिएको पालिकाका स्वास्थ्य प्रमुखहरूले बताएका छन ।