काठमाडौँ — जिल्लाका चार वटा स्थानीय तहमध्ये तीन वटा गाउँपालिकामा अस्पताल छैनन् । स्थानीय तह संचालनमा आएको साढे ६ वर्षसम्म पनि तीन पालिकाले अस्पताल संचालन गर्न नसक्दा स्थानीयलाई औषधि उपचारमा असुविधा छ ।

छायाँनाथ रारा नगरपालिकामा एक मात्र १५ शैया क्षमताको अस्पताल छ । सोरु, खत्याड र मुगुम कार्मारोङ गाउँपालिकामा अस्पताल छैन । प्राथमिक अस्पताल समेत नहुँदा स्थानीयबासीहरुलाई साधारण स्वास्थ्योपचारका लागि समेत सदरमुकाम वा जिल्लाबाहिर जानुपर्ने बाध्यता रहेको छ । 

सरकारले प्रत्येक स्थानीय तहमा १० शैयाको अस्पताल बनाउन निर्देशन जारी गरी शिलान्याश गरिएको भएपनि यहाँका स्थानीय तहले अस्तापल सञ्चालनमा ल्याउन सकेका छैनन् । सोरु गाउँपालिकामा तीन वर्षअघि सीप तारापानीमा शिलान्याश गरिएको १० शैयाको अस्पताल अहिलेसम्म  पनि निर्माण सम्पन्न भएको छैन । 

अस्पताल निर्माणको लागि संघीय सरकारबाट ११ करोड बजेट बिनियोजन गरी निर्माण कार्य सुरु गरिएको भएपनि अहिलेसम्म काम पूरा हुन सकेको छैन । करिब १८ हजार जनसंख्या र ११ वटा वडा रहेको गाउँपालिकामा अस्पताल नहुँदा बिरामीलाई डाक्टरको मुख देख्न गाह्रो भएको छ । गाउँपालिकामा अस्पताल नहुँदा सामान्य रोगको उपचारका लागि समेत जिल्ला अस्पताल पुग्नु पर्ने बाध्यता रहेको स्थानीय धनरुप बुढा बताए ।