मुगु — हिमपात भएपछि मुगुका किसान उत्साही भएका छन् । खडेरीले चिन्तित भएका उनीहरु हिउँ परेसँगै बाली सप्रने आसमा छन् ।
जिल्लामा बिहीबार दिउँसोबाट मौसममा बदली भई रातिदेखि हिउँ पर्न सुरु गरेको हो । रारा, मुर्मा मुन्दु, ताल्च, माथितुम, सोरुकोट, कालै, शोभा, बाम, खमाले, पापु, चिमाथलगायत बस्तीमा आधा फिटसम्म हिउँ जमेको छ ।
‘खडेरीले जौ–गहुा सुकाइसकेको थियो,’ सोरुकोट गाउँका पदम शाहीले भने, ‘अब हिउँ पर्यो सुबिकाल हुने आस पलायो ।’
किसानहरुका अनुसार जति धेरै हिउँ पर्यो उति धेरै अन्न उत्पादन हुने गर्छ । स्याउ, ओखर, आरूलगायत फल पनि सप्रन्छन् । पानीका मूल पनि बढ्न गरेका छन् । विकट भेगका किसानलाई यो सिजनमा हिउँ नपरे सुबिकाल आउँदैन । ‘हिउँको प्रतीक्षा गर्दै पुस बित्यो,’ शाहीले भने, ‘माघ बित्न थालेपछि बल्न हिउँ देख्न पाइयो ।’
पहिले पुस महिनामै बाक्लो हिमपात हुने गरेकामा पाँच वर्षयता माघ अन्तिमदेखि फागुन–
चैतमा हिउँ पर्न थालेको छ ।
जिल्लाको उत्कृष्ट पर्यटकीय गन्तव्य रारामा यसपटक दोस्रोपटक हिउँ परेको छ । हिउँ परेपछि घुम्न आएका आन्तरिक पर्यटक खुसी भएका छन् । रारामा यस वर्ष दोस्रोपटक आधा फिट हिउँ परेको रारा राष्ट्रिय निकुञ्जका संरक्षण अधिकृत बद्रीविनोद दाहालले बताए ।
