बागलुङ — आइतबार रातिको वर्षाका कारण कालीगण्डकी करिडोरमा पहिरो खस्दा सडक अवरुद्ध भएको छ । जैमिनी नगरपालिका–७ र ८ को सिमानानजिक बेलबगरमा पहिरो र लेदो खस्दा सडक अवरुद्ध भएको हो ।

कालीगण्डकी करिडोर हुँदै बागलुङ, म्याग्दी र मुस्ताङ आएका पर्यटक गुल्मी, पाल्पा र बुटवल फर्कने गर्छन् । सडक अवरुद्ध भएपछि सवारीसाधन रोकिएका छन् भने यात्रुहरू पनि अलपत्र परेका छन् ।

प्रहरी नायब उपरीक्षक रामेश्वर त्वातीका अनुसार सडक खुलाउने प्रयास भइरहेको छ । सडक पूर्ण रूपमा अवरुद्ध भएपछि स्थानीयले प्रहरीलाई खबर गरेका थिए । लगातार वर्षा भइरहेका कारण लेदो खसिरहेको र सडक खुलाउन कठिनाइ भइरहेको प्रहरीले जनाएको छ ।

यसैबीच, सालझण्डी–ढोरपाटन सडकको फल्लेघरदेखि माथिको खण्ड पनि अवरुद्ध भएको छ । आइतबारदेखि नै उक्त क्षेत्रमा लेदो खस्दा सडक पटक–पटक अवरुद्ध भइरहेको नगरका कार्यवाहक प्रमुख धनबहादुर अदैले बताए ।