मुदी, म्याग्दी — धवलागिरि हिमाल आरोहण भएको ६६ वर्ष पुगेको अवसरमा म्याग्दीको धवलागिरि गाउँपालिका-४ मुदीमा आरोहण दिवस मनाइएको छ । ट्रेकिङ एजेन्सिज एसोसियसन अफ नेपाल (टान) गण्डकीले धवलागिरि हिमाल रहेको वडामा बुधबार आरोहण दिवस मनाएको हो । 

संसारका ८ हजार मिटरभन्दा अग्ला १४ हिमालमध्ये सातौँ अग्लो धवलागिरि हिमाल (८,१६७ मिटर) मानवले पहिलोपटक आरोहण गरेको बुधबार ६६ वर्ष पूरा भएको छ । सन् १९६० मे १३ का दिन स्विस–अस्ट्रियन संयुक्त आरोहण टोलीले धवलागिरिको सफल आरोहण गर्दै इतिहास रचेको थियो । म्याक्स आइसेलिनको नेतृत्वमा गएको उक्त टोलीमा दुई नेपाली आरोही निमा दोर्जी शेर्पा र ङवाङ्ग दोर्जी शेर्पासहित सात जना सदस्य सहभागी थिए ।

आरोहण दिवस समारोहमा गण्डकी प्रदेशकी उद्योग तथा पर्यटन मन्त्री यशोदा रिमालले धवलागिरि लगायत गण्डकी प्रदेशका हिमालको अन्तर्राष्ट्रिय क्षेत्रमा प्रचारप्रसार गर्न सके स्थानीयको जीवनस्तरमा परिवर्तन ल्याउने गरी पर्यटकको आगमन हुने बताइन् । सँगसँगै पर्यावरण जोगाउन पनि स्थानीयको भूमिका महत्त्वपूर्ण हुने उनले बताइन् । 'जलवायु परिवर्तनको असर हाम्रो हिमालमा परेको छ,' उनले भनिन्, 'हिमालको अस्तित्व जोगिए मात्रै मानव सभ्यताको अस्तित्व जोगिन्छ ।'_{मुदी गाउँ}

कार्यक्रममा वक्ताले पदयात्रा मार्गमा मोटरबाटो पुग्दा विदेशी पर्यटक घटेको, धवलागिरि सर्किटमा पूर्वाधार अभाव भएको प्रति चिन्ता व्यक्त गरेका थिए । 

प्रदेश सांसद रेशम जुग्जालीले जनताले आफ्नो गाउँमा मोटरबाटो पुगेको एउटै सपना देख्ने भएकाले वैकल्पिक पदयात्रा मार्गको विकास गर्नुपर्नेमा जोड दिए । उनले धवलागिरि गाउँपालिकामा आन्तरिक पर्यटकलाई आकर्षित गर्ने गरी योजना बनाउनुपर्ने बताए । 'अन्नपूर्णमा जस्तै धवलागिरिमा पनि संरक्षण क्षेत्र आवश्यक छ,' उनले भने, ' तर प्राकृतिक स्रोतसाधनको उपयोगमा वञ्चित गराइने हो कि भनेर स्थानीय सशंकित छन् ।'

म्याग्दीका प्रमुख जिल्ला अधिकारी रवीन्द्र आचार्यले धवलागिरि सर्किटमा पूर्वाधार विकासका लागि सरोकारवाला निकायले ध्यान दिनुपर्ने बताए । धवलागिरि गाउँपालिका अध्यक्ष प्रेमप्रसाद पुनले धवलागिरि सर्किटसँगै गुर्जाबाट डोल्पा निस्कने रूट, ढोरपाट शिकार आरक्ष जोड्ने रूटको पनि विकास प्रवर्द्धन गर्नुपर्ने उल्लेख गरे ।