मृत्यु हुनेमा तनहुँको भानु नगरपालिका–११ निवासी करिब ४० वर्षीय सुरेश विक रहेको प्रहरीले जनाएको छ।
लमजुङ — मनाङको मनाङ ङिस्याङ गाउँपालिका–५ भ्राकामा घर मर्मत गर्ने क्रममा तेस्रो तलाबाट खसेर एक मजदुरको मृत्यु भएको छ ।
मृत्यु हुनेमा तनहुँको भानु नगरपालिका–११ निवासी करिब ४० वर्षीय सुरेश विक रहेको प्रहरीले जनाएको छ ।
प्रहरीका अनुसार आइतबार बिहान करिब ९ बजे स्थानीय कालु घलेको घर मर्मत गर्ने क्रममा झ्याल फिट गर्ने बेला विक अचानक चिप्लिएर तेस्रो तलाबाट खसेका थिए । गम्भीर घाइते भएका उनको घटनास्थलमै मृत्यु भएको जनाइएको छ ।
घटनाबारे स्थानीयले बिहान १०:२० बजे इलाका प्रहरी कार्यालय हुम्डेलाई जानकारी गराएका थिए । घटनास्थल इलाका प्रहरी कार्यालय हुम्डेबाट करिब ५ किलोमिटर पश्चिममा पर्छ ।
जिल्ला प्रहरी कार्यालय मनाङका प्रहरी निरीक्षक सुमित कुशवाहका अनुसार शव परीक्षणका लागि बेँसीसहरस्थित प्रदेश अस्पताल लमजुङ पठाउने तयारी गरिएको छ । घटनाबारे थप अनुसन्धान भइरहेको प्रहरीले जनाएको छ ।
