बागलुङ — पर्यटकीय क्षेत्रमा जाने बाटो सहज बनाउन चालू वर्षमा बागलुङमा ९४ वटा पदमार्ग पूरा गरिने भएको छ । एकीकृत सेवा कार्यालयले जिल्लाका पर्यटकीय सम्भावना भएका स्थानमा ती पदमार्गको काम सुरु गरेको हो ।

चालु वर्षको साढे ९ महिनामा ८६ वटा योजना सम्झौता गरेर अगाडि बढेको कार्यालयका सूचना अधिकारी विष्णुनाथ शर्माले जानकारी दिए । ८ योजना भने अझै सम्झौता भएका छैनन् । पर्यटन प्रवर्द्धन गर्ने लक्ष्यले ती योजना बनेका थिए । यसरी सम्झौता भएका अधिकांश योजना स्थानीय स्रोतसाधनबाट निर्माण हुनेछन् । 

संचालिन योजनामा २१ योजना सम्पन्न भइसकेका छन् । तीमध्ये १० लाख लागतको बालप्रभा आधारभूत विद्यालयदेखि जलजला जाने बागलुङ नगरपालिका–१३ को योजना सम्पन्न भइसकेको हो । त्यस्तै गलकोट नगरपालिका–५ को सिमलबोट होमस्टे जाने पदमार्ग पनि पूरा भएको छ । बनेका सबै योजनामा ढुंगाका सिंढी लगाएर पदमार्ग बनाइएको छ भने विश्राम स्थलहरू पनि काठ र ढुंगाबाट परम्परागत रूपमा बनेका छन् । यो अभियानमा अधिकांश ५ लाखदेखि १० लाखका योजना छन् ।

विशेषगरी मौलिक कला र श्रम प्रयोग गरेर पदमार्ग निर्माण गर्दा पर्यटन प्रवर्द्धनमा पनि सहयोग पुग्ने विश्वासले यस्ता योजना संचालन गरिएको कार्यालयका प्रमुख शिव शर्माले बताए । उनका अनुसार स्थानीयले मौलिक सामग्री प्रयोग गर्दा होमस्टे, धार्मिक तथा पर्यटकीय क्षेत्रको समेत पहिचान र प्रवर्द्धन हुने भएकाले सोही प्रकृतिका योजना समावेश गरेको उनले जानकारी दिए । 

समुदाय सक्रिय भएका अधिकांश स्थानमा साझेदारीमा काम भएका छन् । १० लाखको योजना बनाउन स्थानीय सक्रिय बन्दा १५ लाखसम्मको काम भएको हो । 

समुदाय परिचालन गर्न नसकिने केही स्थानमा भने ढलान वा सिमेन्ट प्रयोग भएका पदमार्ग पनि बनेका छन् । ती मार्गलाई पनि सकेसम्म मौलिक बनाउने प्रयास भएको शर्माले जानकारी दिए । वैशाख १० गतेसम्मको तथ्यांक अनुसार ९४ वटा पदमार्ग योजनाको छनोट भएकामा ८ वटा योजनाको सम्झौता हुन बाँकी छ । ती योजनामा आन्तरिक विवाद देखिएकाले योजना सम्झौता नभएको हो ।