बागलुङ — वर्षात लाग्ने बेला भैसक्यो, हरेक वर्ष यहाँका स्थानीयलाई खोलामा अलपत्र पुलले सताउने गरेको छ । आठ वर्षअघि नै संचालनमा आएर नागरिकले सेवा पाउनुपर्ने पुलहरू अलपत्र परेपछि स्थानीयले गुनासो गर्न थालेका हुन् ।

बागलुङको गलकोट नगरपालिका वडा नं ८ र ९ जोड्ने दरमखोला र ढोरपाटन नगरपालिकाको वडा नं ५ को भुजीखोला पुल बनिनसक्दै जीर्ण हुन थालेका छन् । आठ वर्षअघि काम थालेर अलपत्र परेको ३ करोड ३४ लाख लागतको भुजीखोला पुलमा उठाएका फलामे पिलरमा खिया लागिसकेको छ । अझै कहिले बन्छ– यकिन छैन । यहाँ झण्डै २ करोड खर्च भैसकेको छ । नियमित बनेको भए २०७४ को माघमा बनिसक्नुपर्ने यो पुलका दुईवटा पिलर मात्र ठडिएका छन् । अब कहिले बन्छ भन्ने यकिन छैन । 

ढोरपाटन नगरपालिका वडा नं ५ को भुजीखोलाको पुलको पनि उस्तै हविगत छ । २०७७ मा बोबाङमा आएको बाढीपछि यो पुलको पश्चिमतर्फको पिलर नजिकैको जमिन खोलिएको छ । जसको कारण थप अर्को पिलर चाहिने अवस्था बनेको छ । त्यसका लागि डिजाइन पनि फेर्नुपर्ने अवस्था छ । सडक डिभिजन कार्यालयले नयाँ ठेक्का, डिजाइन परिवर्तन लगायतको काम गरेर विभागमा पठाए पनि बजेट अभावले काम थाल्न नसकेको बताउने गरेको छ ।

वाईपी रफिना संयुक्त निर्माण कम्पनीले ठेक्का लिएको यो पुल २०७३ असोज ४ गतेको ठेक्का सम्झौता अनुसार काम गरेको भए २०७४ को माघ ४ गते सकिनुपर्ने थियो । लामो समय अलपत्र पारेर अन्तिम पटक २०७७ मंसिर १४ मा थपिएको म्यादमा पनि कुनै प्रगति नभएपछि कार्यालयले तीन वर्षअघि यो पुलको ठेक्का रद्द गरेको थियो ।

ठेक्का रद्द भए पनि स्थानीयले भने हरेक वर्ष यात्रामा सास्ती खेपेका छन् । वर्षातमा जोखिम भएकाले बुढाथर पुगेर घुमाउरो बाटो हिँड्न बाध्य छन् । ‘न पुल बन्यो, न यहाँ फड्के हाल्ने ठाउँ रह्यो,’ स्थानीय शिक्षक चूडामणी पौडेलले भने, ‘विद्यालय  आउजाउ गर्न सधैंको सास्ती खेपेका छौं ।’ यहाँको भुजी माविका विद्यार्थीले नजिकको बाटो हिँड्न नपाएर हिउँद र वर्षातमा सास्ती खेपेका छन् । स्थानीयले सामान ढुवानी गर्न पाएका छैनन् ।

सडक डिभिजनका प्राविधिकले आफ्नो तर्फको काम सकेर मन्त्रालयमा फाइल पठाएको पनि तीन वर्ष भैसकेको छ । पछिल्लो समय खोलाको बहाव फेरिइरहेकाले इन्जिनियरहरू नियमित पुगेर फेरिएको संरचनाबारे नक्सांकन गर्ने र आवश्यक रकमसहितको प्रतिवेदन लेख्ने काम गरिरहेका छन् । तर आर्थिक संकट भन्दै अर्थ मन्त्रालयले बजेट सुनिश्चित नगर्दा ठेक्का लगाउन नसकेको डिभिजन प्रमुख हरिप्रसाद सुवेदीले बताए ।