बागलुङ — जिल्लाबाट अञ्चल हुँदै प्रादेशिक अस्पताल बनेको धौलागिरि अस्पतालले दर्जन बढी विशेषज्ञ सेवा दिन थालेको छ । शल्यक्रियासहितको सेवाबाहेक यहाँ मानसिक रोग र मृगौला तथा पिसाव सम्बन्धी उपचार सेवा पनि दिन थालिएको हो ।

प्रादेशिक अस्पताल बनेपछि यहाँ दर्जन बढी विशेषज्ञ सेवा दिन थालिएको हो । सेवा थप्दै गएको अस्पतालले पोखरा स्वास्थ्य विज्ञान प्रतिष्ठानको सहकार्यमा पिसाव सम्बन्धी सेवा दिन थालेको हो । मृगौला रोग विशेषज्ञ डा. विकास खत्री नेतृत्वमा आएको टोलीले शनिबारदेखि सेवा संचालन गरेको निमित्त मेडिकल सुपरिटेन्डेन्ट डा. प्रविण घिमिरेले बताए । सेवा सुरु भएको पहिलो दिनमै २५ जना बिरामीले लाभ लिएका थिए ।

दक्ष जनशक्तिको व्यवस्थापन नभएसम्म प्रतिष्ठानका चिकित्सकको उपस्थितिमा सेवा प्रवाह गर्न थालिएको अस्पतालका अध्यक्ष श्रीप्रसाद शर्माले बताए । त्यसपछि भने आवश्यक दरबन्दी ल्याएर नियमित सेवा संचालन गर्ने लक्ष्य राखिएको उनले बताए ।

मृगौला र पिसाव सम्बन्धी उपचार सुविधा नभएकोले यहाँका धेरै बिरामी पोखरा र काठमाडौं जान बाध्य थिए । ‘सुरुवातको रुपमा साझेदारीमा सेवा संचालन गरिएको हो, चिकित्सकको दरबन्दी आएपछि नियमित सेवा संचालन हुनेछ,’ मेडिकल सुपरिटेन्डेनट डा. किरण तिवारीले भने, ‘हामीले दैनिक र मासिक रुपमा मानसिक समस्याको उपचार सेवा पनि थालेका छौं ।’ अब यहाँबाट  कुनै पनि सेवा अबरुद्द छैन भन्ने बनाइसकेका छौं । अस्पतालमा दुई वर्षदेखि ट्रमा उपचार कक्ष पनि संचालन छ ।

‘हरि खड्का ट्रमा सेन्टर’ बनाउने सरकारी योजना भने पूरा भएको छैन । तर ट्रमाको सेवा गरेको रेकर्ड राख्ने र आवश्यक उपचार अन्य चिकित्सकबाट पनि दिने गरिएको हो । सेन्टरकैलागि अस्पतालले सिटि स्यानसहितका मेसिन भित्र्याइसकेको छ ।

मृगौला रोग, पिसावमा प्रोटिन देखिने, उच्च रक्तचाप नियन्त्रणमा समस्या, शरीर सुन्निने, मधुमेहलगायतका धेरै सेवा पनि संचालनमा आउन थालेका छन् । अस्पतालले नर्सिङ पढाइको तयारी पनि थालेको छ । विशेषज्ञ चिकित्सक थप गर्न सकेमा नर्सको दरबन्दी नभए पनि सेवा संचालन गर्न सकिने अवस्था बनेको तिवारीले बताए । चालु वर्ष गण्डकी प्रदेश सरकाले ७० लाख रुपैयाँ बजेट विनियोजन गरेर काम थालिसकेको हो ।

अस्पतालमा मुटु रोगको उपचार गराउने कक्ष बनाउन पनि दबाब बढेको छ । ‘हामीले धेरै पटक पहल गरिरहेका छौं, अब मुटु रोगको प्रारम्भिक उपचार कक्ष चाहिन्छ,’ गण्डकी प्रदेशका पूर्वस्वास्थ्य निर्देशक डा. रामबहादुर केसीले भने, ‘अब कार्डियोलोजिष्टको दरबन्दी र उपचारकक्ष आवश्यक छ ।’ बिरामीको मृत्युदर घटाउन यो काम आवश्यक भएको उनले बताए ।