बागलुङ — शुक्रबारदेखि परेको झरीपछि ढोरपाटन क्षेत्रमा हिमपात भएको छ । हिमपातले ढोरपाटन उपत्यका सेताम्मे भएको छ । 

जाडो मौसममा बेंसी झरेका स्थानीय र गाईभैंसीसहित उपत्यका पुगेका गोठालाहरु हिमपातले प्रभावित भएका छन् । अहिले अधिकांश मानिस घरभित्रै रोकिएका छन् भने गाईबस्तुलाई समेत घाँसअभाव भएको छ । 

अधिकांशले यसअघि गोठभित्र राखेको सुक्खा घाँस (बातो) खुवाइरहेको स्थानीय नरमती पुनले बताइन् । जाडोको कारण मानिस घरभित्रै आगो तापेर बसेका छन् । ढोरपटनका स्यालपाखे, नवी, छेन्तुङ, निसेलढोर, देउरालीलगायतका क्षेत्रमा बाक्लो हिउँ जमेको छ भने उपत्यका पनि सेताम्मे देखिएको छ । 

यतिबेला उपत्यकामा आलु लगाउने समय हो । ‘मैले त एक साता लगाएर आलु रोपिसकेकी छु, काम गरिरहेकालाई समस्या भयो,’ पुनले भनिन्, ‘झरी र हिउँले केही दिनदेखि काम गर्न अप्ठ्यारो भएको छ ।’ मौसम सफा भए दुई/चार दिनमा आलु लगाउन सकिने उनले बताइन् । किसानहरुले चैत पहिलो साता लगाएको आलु साउनमा खनेर निकाल्छन् ।