पर्वत — पर्वतको मोदी गाउँपालिका अन्तर्गतको मुख्य व्यापारिक बजार डिमुवा र पातीचौरबाट निस्कने फोहोर जथाभावी फाल्ने र जलाउने गरिएको पाइएको छ । स्थानीय बासिन्दाले पटक–पटक समस्या समाधानका लागि पालिकालाई खबरदारी गरे पनि प्रभावकारी पहल नभएको गुनासो गरेका छन् ।

स्थानीय राम केसीका अनुसार बजार क्षेत्रबाट संकलन गरिएको फोहोर डिमुवा र पातीचौर आसपासका विभिन्न स्थानमा छरपस्ट फाल्ने गरिएको छ । बर्खाको समयमा फोहोर सिधै मोदी खोलामा फाल्ने र हिउँदमा भने खोला किनारमा थुपारेर जलाउने गरिएको उनले बताए ।

मोदी गाउँपालिकाका वडा नं. २, ५ र ६ बाट निस्कने फोहोर यसरी व्यवस्थापनबिनै फाल्ने र जलाउने गरिएको हो । बाजुङ–५ वारि पातीचौर क्षेत्रमा तल्लो मोदी खोला जलविद्युत् आयोजनाको ड्याम मुन्तिरको पुछारतर्फ फोहोर फालिँदै आएको छ । यस्तै, देउपुर–२ पारि पातीचौरतर्फ नेपाल विद्युत् प्राधिकरणको जग्गामा काँडे तार लगाएर फोहोर थुपार्ने गरिएको स्थानीयले बताएका छन् । यसबाहेक धेरै ठाउँमा छरपस्ट फोहोर फाल्ने गरिएको छ । 

‘बजारको बीचमै फोहोर जलाउँदा निस्किने धुवाँ र दुर्गन्धले बस्नै नसक्ने अवस्था हुन्छ,’ स्थानीय ललिता पुर्जाले भनिन् । उनका अनुसार बाजुङ र पातीचौरको सीमामा पर्ने मोटरेबल पुल नजिक शुक्रबार साँझदेखि फोहोर जलाइएको धुवाँ अझै वातावरणमा फैलिरहेको छ । नजिकै पार्वती खोला, मोदी खोला र घाटसमेत भएकाले फोहोर फाल्ने र जलाउने कार्य तत्काल रोक्न स्थानीयले माग गरेका छन् ।